स्याङ्जामा पहिलोपटक नेपाली नागरिकताको पुनः प्राप्ति गरिएको छ । यहाँको पुतलीबजार नगरपालिका – ९ की हेमा कुमारी गुरुङले नेपाली नागरिकता पुन: प्राप्ति गरेकी हुन् ।

गुरुङले पाँच वर्ष पहिला विसं २०७६ पुस २४ गते नेपाली नागरिकता परित्याग गरेकी थिइन् । विसं २०३५ पुस ३ गते हङकङमा जन्म भएकी गुरुङले विसं २०५५ पुस १२ गते जिल्ला प्रशासन कार्यालय स्याङ्जाबाट पहिलो पटक ४८७३४ नम्बरको बंशजको नागरिकता लिएकी थिइन् ।

गुरुङले ब्रिटीस नागरिकताको लागि नेपाली नागरिकता परित्याग गरेपनि ब्रिटीस नागरिकता प्राप्ति नभएपछि नेपाली नागरिकता पुनः कायमको माग गरेकी थिइन् । गुरुङले विसं २०८१ पुस ९ गते नागरिकता पुनः कायमका लागि जिल्ला प्रशासन कार्यालय स्याङ्जामा निवेदन दिएकी थिइन् ।

नेपालको संविधान २०६३ को दफा ११(१) बमोजीम पुरानै नागरिकता पुनः कायम गरी जारी गरिएको प्रजिअ सुनिता नेपालले जानकारी दिइन् ।

पहिला नागरिकता परित्याग गरेपनि ब्रिटीस नागरिकता प्राप्त गर्न नसकेको र नागरिकता ऐन अनुसार पुन: प्राप्ति गर्ने प्रक्रिया पुरा गरेसँगै गुरुङलाई पुरानो नम्बरको नागरिकता दिइएको प्रजिअ नेपालले बताइन् ।

यहाँ विसं २०६७/०२/०३ देखि हालसम्म ८६ जनाले नेपाली नागरिकता परित्याग गरेका छन् भने पुन: प्राप्ती गर्ने गुरुङ पहिलो रहेकी छन् ।

डीभी, पीआर लिएका र विदेशी नागरिकसँग विवाह गरेकाले नागरिकता त्याग गरेको सहायक प्रमुख जिल्ला अधिकारी दीपक पौडेलले जानकारी दिए । उनले विदेशी नागरिकता लिने प्रक्रिया थालेसंगै नेपाली नागरिकता परित्याग गर्नुपर्ने बताए ।