स्याङ्जा जिल्ला क्रिकेट संघको आयोजनामा भएको दोस्रो संस्करणको जिल्लास्तरीय पुरुष अन्तरपालिका स्याङ्जा क्रिकेट लिग – २०८१ को उपाधि गल्याङ नगरपालिकाले जितेको छ ।

पुतलीबजार नगरपालिका – १३, मातृभूमि खेलमैदानमा यहि माघ ३० देखि भएको प्रतियोगितामा आँधीखोला गाउँपालिकालाई २४१ रनको फराकिलो अन्तरले पराजित गर्दै गल्याङ उपाधि विजेता भएको हो ।

टस जितेर पहिला ब्याटिङ गरेको गल्याङले निर्धारित ४० ओभरमा आठ विकेट गुमाएर ३१८ रन जोडेको थियो । ३१९ रनको लक्ष्य पाएको आँधीखोलाले १६.२ ओभरमा सबै विकेट गुमाउँदै ७७ रनमा सिमित भएको थियो ।

प्रतियोगिताको उपाधि विजेता गल्याङ नगरपालिकाले ट्रफी, मेडल र प्रमाण-पत्रसहित ४० हजार रुपैयाँको किटसेट प्राप्त गरेको थियो । उपविजेता आँधीखोला गाउँपालिकाले २० हजार रुपैयाँको किटसेटसहित ट्रफी, मेडल र प्रमाण-पत्रमा चित्त बुझाएको हो ।

यसैगरी, प्रतियोगितामा उत्कृष्ट खेलाडी पुरस्कार स्वरुप बेस्ट बलर चापकोट नगरपालिकाका करण पङ्गेनी, ब्याटर आँधीखोला गाउँपालिकाका ईश्वर क्षेत्री, किपर आँधीखोलाका पुर्ण बहादुर जिटी, फिल्डर चापाकोटका विशाल कोइराला, इमर्जिङ प्लेयर अफ टुर्नामेन्ट भीरकोट नगरपालिकाका साइमन खाँण र प्लेयर अफ द टुर्नामेन्ट आँधीखोलाका ईश्वर क्षेत्रीलाई ट्रफी, मेडल र प्रमाण-पत्रको दिइएको थियो ।

स्याङ्जा जिल्ला भित्रका स्थानीय प्रतिभावान खेलाडीको पहिचान, स्तर वृद्धि तथा खेलप्रति रुचि बढाउने उद्देश्यका साथ प्रतियोगिता आयोजना गरिएको संघका अध्यक्ष दिवाकर थापाले बताए ।