पोखरा । गण्डकी विश्वविद्यालयको कुलपति र प्रदेश नीति तथा योजना आयोग सदस्य आज नियुक्ति गरिँदैछ ।

गण्डकी प्रदेश सरकार मन्त्रिपरिषद बैठक आज शुक्रबार बेलुका बस्ने तय भएको छ । बेलुका ५ बजेका लागि बोलाइएको बैठकमा यी नियुक्तिबारे निर्णय हुने बताइएको छ ।

गण्डकी विश्वविद्यालयको कुलपति नियुक्तिका लागि गठित सिफारिस समितिले ३ जनाको नाम मुख्यमन्त्री सुरेन्द्रराज पाण्डेलाई बिहीबार बुझाइसकेको छ । जसमा प्राडा इन्द्रप्रसाद तिवारी, प्राडा विश्वकल्याण पराजुली र प्राडा सरोज कोइरालाको नाम समावेश छ । ती ३ मध्येबाट १ जना कुलपतिमा नियुक्त हुनेछन् ।

प्रदेश नीति तथा योजना आयोगका सदस्यहरूले राजनीमा दिएपछि यस नियुक्तिको निर्णय समेत गर्ने भएको छ ।

बाबुराम भट्टराई नेतृत्वको नेपाल समाजवादी पार्टी नयाँशक्तिको कोटाबाट नियुक्त माया तिम्सिना र राप्रपाको कोटाबाट नियुक्त दीपक भण्डारीले सरकारकै दबाबमा चैत १७ मा राजीनामा दिएका थिए ।