पोखराको बिरौटामा सञ्चालित श्री गण्डकी शत कुण्डीय कोटिहोम विराट् ज्ञान महायज्ञको प्रचारप्रसार तथा धार्मिक र सामाजिक सद्भावको सन्देश प्रवाह गर्न मानवसेवा फाउण्डेशनले आज साइकल र्‍याली आयोजना गरेको छ ।

बिरौटास्थित कोटिहोम स्थलबाट बिहान ७ बजे सुरु र्‍याली ड्यामसाइड, लेकसाइड, हल्लनचोक, जिरोकिलोमिटर, मालेपाटन, बाग्लुङ बसपार्क, बिन्ध्यवासिनी मन्दिर, भैरवटोल, नालामुख, तेश्रोपट्टी, महेन्द्रपुल, चिप्लेढुङ्गा, न्यूरोड, सभागृहचोक, पृथ्वीचोक, नागढुङ्गा, पुरानो एयरपोर्ट र पार्दी हुँदै पुनः बिरौटा कोटिहोम स्थलमा पुगेर समापन भएको थियो। र्‍यालीमा स्थानीयवासी र युवाको सहभागिता रहेको थियो।

महायज्ञका संकल्पकर्ता विजय कृष्ण मूर्तिले र्‍यालीले स्वास्थ्य, वातावरण संरक्षण, र पर्यटन प्रवर्द्धनको सन्देश प्रवाह गरेको बताए ।

“यो र्‍यालीले इन्धनको बचत, मानव स्वास्थ्यको प्रवर्द्धन, र पोखरा भ्रमण वर्ष २०२५ को विकासमा योगदान पुर्‍याउने हाम्रो लक्ष्यलाई सार्थक बनाएको छ,” उनले भने ।

मानवसेवा फाउण्डेशनका अनुसार कोटिहोम महायज्ञको प्रचारका लागि थप कार्यक्रमहरू पनि सञ्चालन भइरहेका छन्। बैशाख १२ गते ट्याक्सी र्‍याली, बैशाख १३ गते मोटरसाइकल र्‍याली, बैशाख १४ गते फेवातालमा डुङ्गा र्‍याली, र बैशाख १६ गते बृहत् कलश यात्रा आयोजना हुनेछ।

यो साइकल र्‍यालीले धार्मिक, सामाजिक, र पर्यटकीय सन्देशलाई एकसाथ प्रवाह गर्दै पोखराको सांस्कृतिक र पर्यटकीय महत्वलाई थप उजागर गरेको आयोजकको भनाइ छ।

कोटीहोममा सुश्री अनुराधा पाण्डेयले भागवत कथा प्रवचन चैत्र २९ बाट दिन समेत सुरु गरेकी थिइन् । देवी प्रतिभा, दीनबन्धु पोखरेल, चैतन्यकृष्ण महाराज, सुप्रिया किशोरीलगायतले कथावाचन गर्नेछन् । कोटीहोम आगामी वैशाख १७ देखि जेठ २६ गतेसम्म बिरौटाको सदाशिवजी सिद्देश्वर हरिहर मन्दिरको जग्गा र आपपासका स्थानीयको जग्गामा हुनेछ ।