पोखरामा जारी प्रथम लायन्स कप राष्ट्रिय तथा अन्तर्राष्ट्रिय आमन्त्रित पुरुष भलिबल प्रतियोगितामा आज शनिबार पनि दुई खेल हुँदैछन् । समूह चरणको अन्तिम यी दुई खेलहरुबाट सेमिफाइनल समिकरण पूरा हुनेछ ।

आयोजक लायन्स इन्टरनेशनल डिष्ट्रिक्ट ३२५ एम नेपालका डिस्ट्रिक्ट गभर्नर चण्डीप्रसाद अर्यालका अनुसार पहिलो खेल मध्यान्ह १२ः३० बजे गण्डकी भलिबल टीम र सशस्त्र प्रहरीको नेपाल एपीएफ क्लबबीच हुनेछ ।

गण्डकी पहिलो खेलमा ईरानी टोलीसँग ३–१ सेटले पराजित भएको थियो । एपीएफलाई पनि ईरानी टोलीले नै ३–१ सेटले हराएको थियो । समूह ‘ए’ मा यी दुवै टीमलाई हराएका ईरानी टोली लगातार दोस्रो जीतसँगै अन्तिम ४ मा पुगिसकेको छ ।

दोस्रो खेल विभागीय टीमहरू त्रिभुवन आर्मी र नेपाल पुलिस क्बलबीच हुँदैछ । दिउँसो २ः३० बजे समूहचरणको अन्तिम खेलमा समूह ‘बी’ बाट दुई टोली सेमिफाइनल स्थानका लागि खेल्न लागेका हुन् ।

यसअघि, भारतीय टोलीसँग आर्मी ३–१ सेटल पराजित हुँदा कुनै अंक जोड्न सकेको छैन । पुलिसले भने भारतीय टोलीलाई सोझो सेटमा हराएको थियो ।

पोखरा रंगशालास्थित बहुउद्देश्यीय कभर्ड हलमा जारी प्रतियोगिता हेर्नका लागि आजको टिकट दर तीन सय नै कायम गरिएको छ । भोलि आइतबार सेमिफाइनलका खेल हेर्न ४ सय र सोमबार फाइनल खेल हेर्न ५ सय टिकटदर कायम गरिएको आयोजकले जनाएको छ ।

प्रतियोगिताको विजेताले ४ लाख ४४ हजार ४४४ र उपविजेताले २ लाख ४४ हजार ४४४ रुपैयाँसहित ट्रफी, मेडल र प्रमाणपत्र पाउने आयोजकले जनाएको छ । तेस्रो हुने टोलीले १ लाख ४४ हजार ४४४ पाउनेछ । सर्वोत्कृष्ट खेलाडीलाई १४ हजार ४४४ र विधागततर्फ उत्कृष्ट हुनेलाई समान ८ हजार ४४४ रुपैयाँ प्राप्त गर्नेछन् ।

सम्बन्धित समाचारः

भारतीय टोलीले आर्मीलाई हरायो

इरानी टोली सेमिफाइनलमा, गण्डकी पराजित

भारतीय टोली नेपाल पुलिससँग सोझो सेटमा पराजित

पहिलो खेलमा इरानी टोलीले एपिएफलाई हरायो