पोखरा । पोखरा महानगरपालिका वडा नं. १ को आयोजना, शहरी स्वास्थ्य केन्द्र बगरको व्यवस्थापन र हिमालय आँखा अस्पतालको प्राविधिक सहयोगमा निशुल्क आँखा जाँच शिविर गरिएको छ ।

शनिबार बगर टुँडिखेलमा भएको शिविरमा १ सय २० जना पुरुष, १ सय ८७ जना महिला गरी कुल २ सय ९९ जनाको आँखा परीक्षण गरियो । परीक्षणपछि आवश्यकताअनुसार बिरामीहरुलाई औषधि वितरण गरिनुका साथै १ सय १५ जनालाई चश्मा वितरण गरिएको थियो । परीक्षणका क्रममा ६ जना बिरामीमा मोतिबिन्दु देखा परेपछि शल्यक्रियाका लागि हिमालय आँखा अस्पतालमा सिफारिस गरिएको छ ।

शिविरको उद्घाटन वडाध्यक्ष शाहारा प्रधानले गरे । उनले वडावासी नागरिकको आधारभूत स्वास्थ्य सेवा पाउने मौलिक हकको सम्मान गर्दै गुणस्तरीय स्वास्थ्य सेवा प्रवाह गर्न वडा कार्यालय निरन्तर लागिरहेको बताए ।

कार्यक्रमको अध्यक्षता वडा सदस्य एवम् शहरी स्वास्थ्य केन्द्र व्यवस्थापन समिति उपाध्यक्ष शोभा गुरुङले गरेकी थिइन् । शिविरमा वडा सदस्यहरु जुकमाया परियार, जुमकाजी गुरुङ र रामजी पौडेल, विभिन्न टोल विकास संस्था, आमा समूहका अध्यक्ष तथा महिला सामुदायिक स्वास्थ्य स्वयंसेविकाको उल्लेखनीय सहभागिता थियो ।

शिविरको सञ्चालन पोखरा महानगरपालिका स्वास्थ्य महाशाखाका नसर्ने रोग फोकल पर्सन हरिलाल आचार्यले गरेका थिए ।