गोरखा । गोरखाको शहीद लखन गाउँपालिका–७ स्थित ढुङ्गागाढे भञ्ज्याङनजिकै सडक भासिँदा ढुङ्गागाढे–खाब्दी भञ्ज्याङ सडकमा यातायात सेवा अवरुद्ध भएको छ ।

गएराति परेको वर्षाले सडक भासिएर दुईतर्फी नै सवारी आवागमन अवरुद्ध भएको शहीद लखन–७ का वडाध्यक्ष शरण श्रेष्ठले जानकारी दिए ।
उनका अनुसार गत वर्ष वर्षाले सामान्य क्षति पुगेको उक्त सडक समयमा मर्मत नहुँदा गएरातिको भीषण वर्षाले थप क्षति पुगेको हो । गएको बर्खादेखि नै यो सडक भासिँएर जोखिमपूर्ण अवस्थामा रहँदै आएको थियो ।

शहीद लखन गाउँपालिका प्रवेश गर्ने मुख्य सडक नै अवरुद्ध भएपछि उक्त सडकखण्ड हुँदै आवातजावत गर्ने यात्री समस्यामा परेका छन् । सडक भासिएकाले मोटरसाइकल र पैदलयात्री जोखिम मोलेर ओहोरदोहोर गर्नुपर्ने अवस्था बनेको छ ।

सडक पूर्वाधार विकास कार्यालयले शनिबारदेखि सडक पुनर्निर्माणको काम सुरु गरेको भए पनि वर्षाका कारण निर्माण प्रभावित भएको छ ।