सरोज अर्याल, स्याङ्जा । पुतलीबजार नगरपालिका कार्यालयले गुपचुप रुपमा आँधिखोलाको गिट्टी बालुवाको (ठेक्का) काम को बाँडफाँड गरेको छ ।

आँधीखोलालाई ४ नाका बाँडेको र २ वटा नाकाको फाइनल भएपछि बाँकी २ नाका सेतिदोभान र पुतलीबजार १ आँधिखोलाको नाकामा गुपचुप भएको छ । पहिले निकालेको १५ दिने सूचनामा कसैको आवेदन नपरेपछि ७ दिनको सूचना जारी गरिएकोमा त्यसमा पनि काम थोरै तर मूल्य मर्का गर्ने गरी भएको कारण पछि घटेपछि आवेदन हाल्ने भन्दै व्यवसायीहरु एक मत थिए । तर हप्ता दिने सूचना नै ननिकाली गुपचुप रुपमा काम दिएको स्याङ्जाका युवा व्यवसायी गौरब श्रेष्ठ बताउँछन् ।

नगरपालिका कार्यालय राजश्व शाखाकी सिर्जना लामिछानेले भने यो कुरा स्विकार गरिनन् । ‘हामीले पछि पनि ३ दिने सूचना निकालेका थियौं, कसले च्यातेर फाल्यो थाहा छैन । कुनै व्यवसायीले उप्काएर फालेको हुनुपर्छ । हामी प्रक्रियामा गएको हो ।’ उनले भनिन् ।

व्यवसायी भने नगरपालिकाको रणनीति भएको बताउँछन् । ‘नगरपालिकामा गएर सूचना पार्टीको सूचना कसैले च्यात्न सक्दैन । यिनीहरुको रणनिति हो ।’ व्यवसायी डोल बहादुर मल्लले भने– ‘हामि दिनदिनै नगरपालिका जाँदा कर्मचारीले हामिलाई थाहा छैन । सुचना निकालेको छैन भन्ने तर एक्कासी त्यही बेलुका ठेक्का अरुलाई पर्नु अचम्मको कुरा छ । त्यही दिन फेरि ३ दिने सूचना निकाल्नुको औचित्य के ? यो मिलेमतोमै हो । सरकारकी कर्मचारीको काम यही हो ?’

स्याङ्जाका ठेकेदारहरुको पनि यसमा विरोध छ । पुतलीबजार नगरपालिकाका प्रमुख, उपप्रमुख लगाएत जनप्रतिनिधिहरुको समेत ध्यानाकर्षण गराएको अर्का व्यवसायी कृस्ण भुजेलले जानकारी दिए । अदालतमा मुद्दा हाल्ने र अख्तियारमा निवेदन दिने तयारी पनि भएको मल्लले गण्डकन्युजलाई जानकारी दिए ।