लायन्स क्लब अफ पोखरा अभियानले मृगौला रोगबाट प्रभावितलाई आर्थिक सहयोग प्रदान गरेको छ ।

लायन वर्ष २०२५/२६ को आरम्भ सेवा कार्यक्रम अन्तर्गत कास्कीको मादी गाउँपालिका–१२ निवासी २९ वर्षीय मृगौला रोगबाट प्रभावित विशाल रानाभाटलाई ३० हजार ५ सय आर्थिक सहयोग प्रदान गरेको क्लबले जनाएको छ ।

दुबै मृगौला फेल भई प्रत्यारोपणको आवश्यकता परेका रानाभाटका लागि क्लबले सुरु गरेको यो सहयोग अभियान सामाजिक उत्तरदायित्वप्रति देखाइएको प्रेरणादायक कदम रहेको उनीहरूको ठहर छ ।

लायन्स क्लब अफ पोखरा अभियानका अध्यक्ष बिनोदराज आचार्यले लायन वर्षको शुरुवात सेवामूलक कार्यबाट गर्न पाएकोमा खुसी व्यक्त गर्दै सानो सहयोगले पनि कसैको जीवनमा सकारात्मक परिवर्तन ल्याउन सक्ने धारणा राखे ।

सहयोग हस्तान्तरण कार्यक्रममा प्रमुख अतिथि निवर्तमान डिस्ट्रिक्ट गभर्नर विनोद ढुंगाना, विशेष अतिथि एरिया १३ संयोजक सूर्य चपाई, विभागीय प्रमुख मातृका पोखरेल र रिजन चेयरपर्सन डिलाराम लामिछानेको उपस्थिति रहेको थियो।

कार्यक्रमको सञ्चालन क्लबका सचिव सुशिल दाहालले गरेका थिए । स्वागत मन्तव्यसहित संयोजनको जिम्मेवारी निर्वाह गरेका दिपेश रानाभाटले सहयोग संकलनदेखि कार्यक्रम व्यवस्थापनसम्मको भूमिका निर्वाह गरेका थिए ।