लेखनाथ उद्योग वाणिज्य संघको आसन्न २९ औं वार्षिक साधारणसभा एवं १५ औं अधिवेशनको मिति तोक्ने विषयलाई लिएर अध्यक्ष र महासचिवबीचको विवाद उत्कर्षमा पुगेको छ ।

गत ४ साउनमा बसेको संघको कार्यसमिति बैठकमा महाधिवेशन मिति तोक्ने विषयलाई लिएर अध्यक्ष विनोद श्रेष्ठ र महासचिव जानुका अधिकारीबीच विवादले संघको आन्तरिक राजनीतिमा गम्भीर असर पारेको छ ।

आगामी अधिवेशन मिति भदौ १४ र १५ वा २० र २१ गते दुई प्रस्ताव राखिए पनि निश्चित निर्णय नभएपछि अधिकांश सदस्य २० र २१ गतेमा सहमत भएका थिए । यद्यपि अध्यक्ष श्रेष्ठले निर्णय अर्को बैठकमा गरिने भन्दै बैठक समापन गरेपछि विवाद चुलिएको हो । त्यसपछि महासचिव अधिकारीले अध्यक्षको असहमतिबिनै पछिल्लो मिति ‘भदौ २०–२१’ भनी निर्णय लेखिन् ।

अध्यक्ष श्रेष्ठले भने संघको विधानअनुसार १ महिनाअघि मिति तोक्नुपर्ने र चुनावी प्रचारमा अनावश्यक खर्च हुन नदिन बैठकपछि निर्णय गर्ने भनिएको स्पष्ट पारे । उनले आफू बैठक सकिएको घोषणा गरेर हिँडिसकेपछि निर्णय पुस्तिकामा मिति लेखिएको भन्दै आपत्ति जनाएका छन् ।

महासचिवले आफ्नो जिम्मेवारी निर्वाह गर्दा दुव्र्यवहार भएको भन्दै उजुरी दर्ता गरिएको बताइन् । उनले विगतमा पनि यस्तै व्यवहार भएको दाबी गर्दै न्यायको खोजीका लागि प्रहरीमा पुगेको जनाइन् ।

संघको अधिवेशन वर्ष परेकाले नेतृत्व चयनका लागि चुनावी सरगर्मी बढ्दै गइरहेको छ । हालसम्म ४ सय ३९ जना नयाँ सदस्य थपिँदा कुल मतदाता संख्या २ हजार १९ पुगेको छ । यसरी भोटलाई प्राथमिकता दिँदै सदस्यता वितरण गरिएको भन्दै व्यवसायीहरूले टिप्पणी गरेका छन् । उनीहरू संघ वास्तविक व्यवसायीको होइन, राजनीतिक प्रभावमा चल्ने खतरा बढेको बताइरहेका छन् ।

आगामी नेतृत्वका लागि हालका वरिष्ठ उपाध्यक्ष राजेन्द्र ओझा र महासचिव जानुका अधिकारीले उम्मेदवारी दिने तयारी गरेका छन् । दुवै पक्षले आ–आफ्नो टिम निर्माण गरी घरदैलो गरिसकेका छन् ।

संस्थापन पक्ष (ओझा टिम) मा उपाध्यक्ष उपेन्द्रराज सुवेदी, मेनुका श्रेष्ठ, धीरज श्रेष्ठ, महासचिव जीवन तिवारी, उपमहासचिव लक्ष्मी ढुंगाना, र कोषाध्यक्ष टीकाराम सापकोटा छन् ।

अधिकारी टिममा गोपीचन्द्र बास्तोला, विक्रम श्रेष्ठ, ध्रुवबाबु भट्टराई, भरतराज ओझा, गंगा मल्ल र हरि बस्ताकोटी छन् ।