पोखरा । प्रसिद्ध लोकगायक कल्याण शेरचनको पूर्णकदको प्रतिमा निर्माण गरिएको छ ।

कल्याण शेरचन स्मृति प्रतिष्ठान, पोखराले निर्माण गरेको उक्त प्रतिमा पोखरा–१८, सहिद पार्कमा स्थापना गर्न लागिएको हो । स्मारकस्थल अन्तिम चरणमा पुगेको प्रतिष्ठानले जनायो । वरिष्ठ कलाकार विष्णुप्रसाद बरालले बनाएका हुन् ।

प्रतिष्ठानको वार्षिक साधारण सभामा अध्यक्ष क्या. पूर्णबहादुर गुरुङ ह्योल्मोले स्मारक निर्माणमा सबैले दिलैदेखि खुलेर सहयोग गर्न आग्रह गरे । उनले भने, ‘कल्याणले बिर्सनै नसकिने योगदान दिएर जानुभएको छ । हामीले पनि उहाँको उदाहरणीय स्मारक बनाउन लागेका छौं । यसमा सबै जुटौँ ।’

प्रमुख आमन्त्रित व्यक्तित्व प्रतिष्ठान सल्लाहकार तथा पोखरा प्रज्ञा–प्रतिष्ठानका संस्थापक कुलपति पदमराज ढकालले कल्याण शेरचन बहुआयामिक व्यक्तित्व भएको उल्लेख गर्दै उनका साथ रहँदाको स्मरण गरे । उनले स्व. शेरचनका स्मरणीय तस्बिर प्रतिष्ठानलाई हस्तान्तरणसमेत गरे ।

अर्का सल्लाहकार पोखरा महानगरपालिकाका वरिष्ठ कानून अधिकृत नारायणप्रसाद पौडेलले स्मारक निर्माण मात्र होइन, दिगो संरक्षणमा पनि ध्यान दिनुपर्ने बताए ।
हिमाली सांस्कृतिक परिवारका अध्यक्ष ज्ञानबहादुर थापाले कल्याण शेरचन प्रतिभाशाली व्यक्तित्व भएको स्मरण गर्दै उनलाई अमर राख्न प्रतिष्ठानले पु¥याएको योगदानको प्रशंसा गरे ।

थकाली सेवा समितिका अध्यक्ष तेजेन्द्र तुलाचनले समितिले स्मारक निर्माणमा सहयोग गर्ने निर्णय गरिसकेको बताउँदै थप सहयोगका लागि पनि तयार रहेको बताए ।
सल्लाहकार तेजबहादुर गुरुङले कल्याण शालीन र प्रेरणादायी व्यक्तित्व भएको स्मरण गर्दै प्रतिमा निर्माण प्रशंसनीय कार्य भएको बताए ।

कार्यक्रममा वरिष्ठ उपाध्यक्ष श्रृजन गुरुङले स्वागत तथा सचिव जीवन दाहालले प्रगति प्रतिवेदन र कोषाध्यक्ष प्रेमराज अधिकारीले आर्थिक प्रतिवेदन प्रस्तुत गरेका थिए ।
त्यस अवसरमा कलाकार तारापति सुवेदी र मञ्जु विकले कल्याण शेरचनले गाएका ‘सुख ज्यानलाई गुँदरी काम्लो’ र ‘कलिलो तामालाई, सोध रामलाई’ गीत प्रस्तुत गरेका थिए ।