स्याङ्जा जिल्लाको पुतलीबजार नगरपालिका –६ टक्सार काउलेमा रहेको नर बहादुर गुरुङको किराना पसलमा साउन १४ गते राति चोरी भएको छ । पसलबाट रियल गोल्ड वियर १७ बोतल, सोफी ब्रान्डको १ कार्टुन रक्सी, ९ प्याकेट विभिन्न कम्पनीका चुरोट, २० प्याकेट चाउचाउ तथा ५ केजी कुखुराको मासु चोरी भएको सूचना प्राप्त भएपछि जिल्ला प्रहरी कार्यालय स्याङ्जाबाट खटिएको टोलीले तत्काल अनुसन्धान थालेको थियो ।

अनुसन्धानको सिलसिलामा प्रहरीले सोही वडाका २२ वर्षीय तोरण परियारलाई चोरीमा संलग्न रहेको आशंकामा केही चोरेका सामानसहित पक्राउ गरेको हो । जिल्ला प्रहरी कार्यालय स्याङ्जाका सूचना अधिकारी प्रहरी नायव उपरीक्षक प्रसन्न राज चौधरीका अनुसार परियारलाई नकवजनी चोरी मुद्दामा स्याङ्जा जिल्ला अदालतबाट ७ दिनको म्याद थप गरी थप अनुसन्धान भइरहेको छ ।

पसल सञ्चालक गुरुङले रातको समयमा पसलको सटर फोडेर चोरी गरिएको बताए । चोरी घटनापछि स्थानीय बासिन्दा रातिको सुरक्षाका विषयमा चिन्तित देखिएका छन् ।

घटनापछि तत्काल अनुसन्धान अघि बढाएर अभियुक्त पहिचान गरी पक्राउ गर्ने प्रहरीको कार्यप्रति स्थानीयले प्रशंसा व्यक्त समेत गरेका छन् । प्रहरीले घटनाका बाँकी पक्षबारे पनि अनुसन्धान भइरहेको जानकारी दिएको छ ।

यस घटनाले स्याङ्जाको शहरी बस्तीहरूमा रातको समयमा हुने चोरीका घटनाप्रति सुरक्षा सतर्कता अझै कडाइ गर्नुपर्ने देखाएको छ । स्थानीय प्रशासनले सर्वसाधारणलाई सतर्क रहन र शंका लागेमा तुरुन्त प्रहरीलाई जानकारी गराउन अनुरोध गरेको छ ।