पोखरा महानगरपालिका–२५, हेमजामा अनावश्यक तथा अव्यवस्थित तार हटाउन थालिएको छ।

वडा क्षेत्रभित्र रहेका त्यस्ता तारलाई वडा कार्यालयको समन्वयमा सोमबारदेखि व्यवस्थापन तथा हटाउन सुरु गरिएको हो ।

विद्युतीय पोल प्रयोग गरी अव्यवस्थित तरिकाले टाँगिएका तथा प्रयोगमा नरहेका अनावश्यक अप्टिकल फाइबर, इन्टरनेट केवल तथा पोलमा जथाभावी झुन्ड्याइएका उपकरण हटाउन थालिएको वडा सदस्य सुवाश भण्डारीले जानकारी दिए ।

त्यस्तै, केही तारलाई क्लिपिङ पनि गरिएको छ । उक्त कार्यमा इन्टरनेट, टेलिफोन, टेलिभिजन, केवल सेवा प्रदायक संस्थाका कर्मचारीले सहजीकरण गरेका छन् ।

वडा सदस्य भण्डारीले सहरी सौन्दर्यीकरणमा प्रत्यक्ष प्रभाव पारेको तथा दुर्घटनाको जोखिम बढेकाले तारहरु हटाउन थालिएको स्पष्ट पारे ।

पहिलो चरणमा याम्दीदेखि मिलनचोकसम्म तथा मिलनचोकदेखि फेदीसम्म दुई खण्ड विभाजन गरी तार व्यवस्थापन थालिएको हो । उक्त कार्य एक हप्ताभित्र सकिने वडासदस्य भण्डारीले जानकारी दिए ।