जिल्ला प्रशासन कार्यालय स्याङ्जाले हिजो दिउँसोदेखि लागू गरिएको कर्फ्यू आज बिहान ६ बजेदेखि हटाएको छ । कर्फ्यू हटेसङ्गै स्याङ्जा क्रमशः सामान्य बन्दै गएको छ । आज बिहानदेखि जिल्लाभरका पसलहरू पूर्णरुपमा खुलेका छन् भने निजी सवारीसाधन पनि चल्न थालेका छन् ।

भ्रष्टाचार र सामाजिक सञ्जाल बन्दको विरोधमा भदौ २३ र २४ गते राष्ट्रव्यापी रुपमा जेन-जेड समूहले गरेको आन्दोलनको प्रभाव स्याङ्जामा समेत परेपछि बुधबार दिउँसोदेखि कर्फ्यू जारी गरिएको थियो ।

कर्फ्यू पुनः लगाउने वा नलगाउनेबारे अवस्था हेरेर निर्णय गरिने प्रमुख जिल्ला अधिकारी (प्रजिअ) ईश्वरीप्रसाद अर्यालले जानकारी दिए । उनले भने, “जिल्लाको अवस्था सामान्य हुँदै गएको छ । आज दिनभर उच्च सतर्कता अपनाइनेछ, त्यसपछि आवश्यकता अनुसारको निर्णय लिइनेछ ।”

नेपाल आर्मी पनि जिल्लामा हुने संकास्पद गतिविधि नियन्त्रणमा सक्रिय हुने प्रजिअ अर्यालको भनाइ छ । तर देशभर निषेधाज्ञा जारी भएकाले सभा–जुलुस तथा भीडभाडमा भने कडा प्रतिबन्ध कायम रहने उनले स्पष्ट पारे ।

यसैबीच, स्वास्थ्य, खानेपानी लगायतका अत्यावश्यक सेवामा भने कुनै अवरोध नआएको प्रशासनले जनाएको छ । सेवा प्रवाहमा समस्या परे तत्काल जिल्ला प्रशासनसँग सम्पर्क गर्न आग्रह गरिएको छ ।