आन्दोलनका क्रममा जलेर नष्ट भएको जिल्ला प्रहरी कार्यालय कास्कीलाई कलाकारहरूले सहयोगस्वरुप कम्प्युटर र प्रिन्टर उपलब्ध गराएका छन् ।

राष्ट्रिय जनसांस्कृतिक महासंघ नेपाल, गण्डकी प्रदेश समितिले कार्यालय प्रमुख प्रहरी उपरीक्षक श्यामबाबु ओलियालाई एक थान कम्प्युटर र एक थान प्रिन्टर हस्तान्तरण गरेको हो ।

महासंघ गण्डकी प्रदेशका अध्यक्ष शंकर बिरही गुरुङ, केन्द्रीय सचिव सुवाश मल्ल, निवर्तमान केन्द्रीय उपमहासचिव मनकुमार श्रेष्ठ, प्रदेश इन्चार्ज राजेन्द्र सापकोटा, केन्द्रीय सदस्य जीवन दाहाल, प्रदेश सचिव भुपेन बानियाँ, समाजसेवी वेद बहादुर जिसी, पर्वत अध्यक्ष दिपक गदाललगायतको उपस्थितिमा कम्प्युटर र प्रिन्टर हस्तान्तरण गरिएको थियो ।

अध्यक्ष गुरुङले सुरक्षाको अग्रपंक्तिमा खटिने प्रहरीलाई कठिन परिस्थितिमा साथ दिनु कलाकारहरूको सामाजिक दायित्व भएको बताए । भदौ २४ गते भएको जेन-जेड समूहको आन्दोलनका कारण कार्यालयमा भएका सबै उपकरण जलेर नष्ट भएपछि दैनिक कार्य सञ्चालन सहज होस् भन्ने उद्देश्यले सहयोग गरेको उनले स्पष्ट पारे ।

गत आन्दोलनमा डोजरसहित प्रवेश गरेका प्रदर्शनकारीले जिल्ला प्रहरी कार्यालयमा तोडफोड, लुटपाट र आगजनी गरेका थिए । यस क्रममा प्रहरीलाई कार्यालय छाड्नुपरेको थियो भने केही हतियार लुटिएको र केही पुनः फिर्ता भएको प्रहरीले जनाएको छ ।

सोही आन्दोलनमा पोखराका विभिन्न सरकारी निकाय पनि तोडफोड र आगजनीको चपेटामा परेका थिए ।