पोखरा । जेन जी आन्दोलनको पहिलो दिन भदौ २३ मा १९ युवाको मृत्यु भएपछि गण्डकी प्रदेशका ऊर्जा, जलस्रोत तथा खानेपानीमन्त्री फणीन्द्र देवकोटाले राजीनामाको घोषणा गरे ।

विहीबार साँझ बसेको प्रदेश मन्त्रिपरिषद्को बैठकमा मुख्यमन्त्री सुरेन्द्रराज पाण्डेले देवकोटाको राजीनामाबारे ब्रिफिङ गरेका थिए थिए । गण्डकी सरकारका प्रवक्ता एवं अर्थमन्त्री डा.टकराज गुरुङले मन्त्री देवकोटाको राजीनामा फेसबुकबाट दिएको थाहा भएको मुख्यमन्त्रीले क्याविनेट बैठकमा जानकारी गराएको बताए ।

केन्द्र सरकारले १९ जनाको हत्या गरेको, युवाको सहादत र सयौं घाइते भएको घटनाले मर्माहत बनाएको भन्दै देवकोटाले राजीनामा दिएका थिए । देवकोटा नेपाल समाजवादी पार्टी (नयाँ शक्ति) का तर्फबाट मन्त्री बनेका हुन् । मन्त्रीबाट फिर्ता हुन पार्टीले पनि निर्देशन दिएको उनले जनाएका थिए । उनी माओवादी केन्द्रको चुनाव चिह्नमा गोरखाबाट निर्वाचित प्रदेशसभा सदस्य हुन् ।

तर उनको राजीनामा अहिलेसम्म प्रदेश सरकारसमक्ष भने पुगेको छैन । उनले भदौ २४ मा कागजमा हस्तलिखित राजीनामा सार्वजनिक गरेका थिए ।

सम्पादन गरिएकोः सं.