कास्की कारागारमा ७ सय ७३ कैदीबन्दी थिए । उनीहरु असोज ६ गतेसम्म कारागारमा ४ सय १ जना आएको कारागारका प्रमुख राजेन्द्र शर्माले जानकारी दिए । अब ३ सय ७२ जना कैदी अझै फरार छन् ।

अहिले पोखराको जनजीवन सामान्य हुँदै गएको छ । स्थिती सामान्य बन्दै गएपछि कास्की कारागारले कैदीबन्दीलाई फर्कन आग्रह गरिरहेको छ ।

भदौ २४ गते कास्की जिल्ला कारागारबाट भागेका लगभग सबैजसो सहकारीसम्बन्धी मुद्दाका प्रतिवादी फरार छन् । पोखरा केन्द्रित ७ सहकारीका २४ जना प्रतिवादी कारागार चलान भएका थिए । तीमध्ये ३ जनामात्रै फर्किएको बताइएको छ । बिन्दवासिनी सहकारीका सुवर्णमान नकर्मी, अर्का एक प्रतिवादी र सूर्यदर्शन सहकारीका शिवबहादुर गुरुङ (महेन्द्र गुरुङ) फर्किएका हुन् । अन्य कोही पनि फरार प्रतिवादी फर्किएका छैनन् ।

फरार भएकामध्ये धेरैजसो बाहिरी जिल्लाका छन् । अदालत र कारागारले फरार प्रतिवादीहरूलाई डेटलाइन राखेर सूचना जारी गर्नुपर्ने र तुरुन्त पक्राउ गर्नुपर्ने सहकारी पीडितहरूको माग छ ।

तोकिएको मितिभित्र नफर्किएमा कारागार ऐन अनुसार उनीहरूलाई थप कारबाही हुने कारागार प्रमुख शर्माले जानकारी दिए । उनका अनुसार ऐनमा ऐन विपरीत काम गर्नेलाई ६ महिनादेखि १० वर्षसम्म जेल सजाय हुने व्यवस्था छ । दसैँअघिको बिदाभन्दा पहिले नफर्किएमा सोही सजाय लागु हुने उनले सुनाए ।