स्याङ्जाको भीरकोट नगरपालिका –१ सिसौघारीस्थित खेलमैदानमा जारी पालिका स्तरीय पुरुष भलिबल प्रतियोगिता फाइनल चरणमा प्रवेश गरेको छ ।

बयरघरी पिस युथ क्लबको आयोजनामा असोज २३ गतेदेखि सुरु भएको चौथो बयरघारी रमाइलो मेलाको मुख्य आकर्षण बनेको यस प्रतियोगिताका सेमिफाइनल खेलमा भीरकोट नगरपालिका र पुतलीबजार नगरपालिकाले प्रतिद्वन्द्वीलाई पराजित गर्दै उपाधिका लागि भिड्ने भएका हुन् ।

पहिलो सेमिफाइनल खेलमा भीरकोट नगरपालिकाले वालिङ् नगरपालिकालाई ३–२ को सेटले विजयी प्रदर्शन गर्दै फाइनलको लागि स्थान प्राप्त गरेको थियो ।

भीरकोटले पहिलो र दोस्रो सेट क्रमशः २५-२२, २५-२२ को स्कोरमा जितेको थियो भने वालिङले तेस्रो र चौथो सेट २५-१९, २५-१९ ले आफ्नो पक्षमा पारेको थियो । तर निर्णायक पाँचौं सेटमा भीरकोटले पुनः दमदार प्रदर्शन गर्दै १५-११ ले जित हात पारेको हो ।

त्यसैगरी, दोस्रो सेमिफाइनलमा पुतलीबजार नगरपालिकाले बिरुवा गाउँपालिकालाई ३–२ को सेटले हराउँदै आफ्नो फाइनलमा यात्रा तय गरेको छ । पुतलीबजारले पहिलो सेट २३-२५, दोस्रो सेट २६-२४, तेस्रो २५-१९, चौथो १८-२५ र निर्णायक पाँचौं सेटमा वालिङलाई १५-९ को अङ्कले पराजित गर्न सफल रहेको हो ।

क्लबका अध्यक्ष रोशन गुरुङका अनुसार रमाइलो मेलाको अन्तिम दिन कार्तिक २ गते आइतबार तेस्रो स्थान र फाइनल खेल हुने भएको छ ।

प्रतियोगिताको विजेता टोलीले एक लाख १५ हजार रुपैयाँसहित ट्रफी, मेडल र प्रमाणपत्र प्राप्त गर्नेछ । उपविजेतालाई ७० हजार, तेस्रो हुने टोलीलाई ४० हजार र सान्त्वना टोलीलाई ३० हजार रुपैयाँसहित ट्रफी, मेडल र प्रमाणपत्र प्रदान गरिनेछ ।

साथै, सर्वोत्कृष्ट खेलाडीसहित उत्कृष्ट स्पाइकर, लिफ्टर, ब्लकर, लिब्रो, क्वीकर र सर्वरलाई पनि पुरस्कार प्रदान गरिने आयोजकले जनाएको छ ।