स्याङ्जाको गल्याङ नगरपालिका –१ मालुङ्गास्थित गणेश बस्यालको घरमा तास खेलिरहेको विशेष सूचनाको आधारमा प्रहरीले छापा मार्दा सात जना पक्राउ परेका छन् । पक्राउ परेकामध्ये एकजना पूर्व वडाअध्यक्ष र एकजना हालका वडासदस्यसमेत रहेको खुलासा भएको छ ।

जिल्ला प्रहरी कार्यालय स्याङ्जा र वडा प्रहरी कार्यालय वालिङको संयुक्त टोलीले प्रहरी नायब उपरीक्षक कमलराज पण्डितको कमाण्डमा असोज ३ गते दिउँसो करिब साढे ३ बजेतिर गरिएको छापामा १५६ पत्ती तास (३ बुक) र १ लाख ९७ हजार ७ सय रुपैयाँ नगद बरामद गरिएको सूचना अधिकारी प्रहरी नायब उपरीक्षक प्रसन्न राज चौधरीले जानकारी दिए ।

उनका अनुसार पक्राउ पर्नेहरूमा गल्याङ नगरपालिका -१ का ५० वर्षीय गणेश बस्याल, ७२ वर्षीय कुस्मखर न्यौपाने, ५९ वर्षीय ओम प्रसाद श्रेष्ठ, ५१ वर्षीय लक्ष्मीप्रसाद बस्याल, ४४ वर्षीय सुन्दर बस्याल, ४२ वर्षीय चुडामणि बस्याल र लोकनाथ बस्याल रहेका छन् ।

सूचना अधिकारी चौधरीले पक्राउ परेकाहरूलाई आवश्यक अनुसन्धान तथा कानूनी प्रक्रिया अघि बढाइएको बताएका छन् ।

जनप्रतिनिधिहरु नै जुवाखालमा समातिँदा जनप्रतिनिधिहरूको आचरणप्रति प्रश्न उठेको छ । पक्राउ परेकामध्ये गणेश बस्याल नेकपा एमालेबाट स्थानीय तह निर्वाचन २०७४ का निर्वाचित पूर्व वडाअध्यक्ष र ओम प्रसाद श्रेष्ठ नेपाली काङ्ग्रेसबाट स्थानीय तह निर्वाचन २०७४ र २०७९ का निर्वाचित बहालवाला वडासदस्य रहेका छन् ।