स्याङ्जाको कालीगण्डकी गाउँपालिका –३ लसर्घा आलमदेवी देउरालीमा जनज्योति युवा क्लबले आयोजना गरेको ३९औं वडा स्तरीय पुरुष भलिबल प्रतियोगिता गल्याङ नगरपालिका -७ च्याम्पियन बनेको छ ।

हरिबोधनी एकादशी पर्वको अवसरमा भएको प्रतियोगितामा कालीगण्डकी गाउँपालिका -१ लाई २५-१८, २५-२३ र २५-१८ को अंकसहित ३-० को सोझो सेटमा पराजित गर्दै गल्याङ नगरपालिका –७ विजेता भएको हो ।

विजेता गल्याङ -७ ले एक लाख ३० हजार रुपैयाँ नगदसहित शिल्ड, मेडल र प्रमाणपत्र प्राप्त गरेको हो भने उपविजेता कालीगण्डकी गाउँपालिका –१ ले ८० हजार रुपैयाँ नगदसहित शिल्ड, मेडल र प्रमाणपत्रमा चित्त बुझाएको हो ।

यस्तै, तेस्रो भएको कालीगण्डकी –३ र सान्त्वना कालीगण्डकी –४ ले क्रमशः ४० हजार र २० हजार नगदसहित शिल्ड, मेडल र प्रमाणपत्र पुरस्कार पाएका हुन् ।

प्रतियोगितामा सर्वोत्कृष्ट खेलाडी सुगम विक (गल्याङ-७), उदयमान खेलाडी अभिनास सेन्चुरी (कालीगण्डकी-३), उत्कृष्ट स्पाइकर उमेश सेन्चुरी (गल्याङ-७), उत्कृष्ट सेटर सौरभ गुरुङ (गल्याङ-७), उत्कृष्ट ब्लकर रवि केसी (कालीगण्डकी-३), उत्कृष्ट सर्भर नवीन महतो (कालीगण्डकी-१), उत्कृष्ट डिफेन्डर राजन दर्लामी मगर (गल्याङ-७) र उत्कृष्ट प्रशिक्षक उमेश श्रेष्ठ (गल्याङ-७) घोषित भएका थिए ।

सर्वोत्कृष्ट खेलाडीले तीन हजार रुपैयाँ नगदसहित ट्रफी र विधागतका अन्य खेलाडी र प्रशिक्षकलाई जनही एक हजार पाँच सय रुपैयाँका दरले पुरस्कृत गरिएको थियो ।

विजेता, उपविजेता टिमका साथै विधागततर्फ सबैलाई कालीगण्डकी गाउँपालिका अध्यक्ष खिम बहादुर थापालगायतले पुरस्कार प्रदान गरेका हुन् ।

कार्तिक १६ गतेदेखि सुरु भएको प्रतियोगितामा चर्चित भलिबल खेलाडी रवि केसीसहित उमेश सेन्चुरी, मनिस मानन्धर, हरि पाण्डे, नवीन महतो, सूर्य विक, रुपेन्द्र गैह्रे, सन्तोष महत, सुगम विक र गण्डकीका चर्चित डिफेन्डर राजन दर्लामीसहितको छ टिमको सहभागिता रहेको थियो ।

कार्यक्रममा लोक तथा दोहोरी गायक मिलन लामा, किस डान्स एकेडेमी रामपुर, पाल्पाका कलाकारहरूले आकर्षक प्रस्तुति दिएका थिए ।