नवलपुर कावासोती २ स्थित कावासोती हाट बजारमा बिक्रीका लागि राखिएको काउलीमा विषादी अत्याधिक भेटिएपछि जफत गरेर नष्ट गरिएको छ । कावासोती हाटबजारमा रजहरका किसान बन्चु मियाँले बिक्रीका लागि पठाएको काउलीमा ९८ दशमलब ८५ प्रतिशत विषादी भेटिएको हो ।

सोमबार हाटबजारमा तरकारीहरुको विषादी चेकजाँचका क्रममा उनले उत्पादन गरेर बजारमा पठाएको काउलीमा उपभोक्ताले खानै नमिल्ने गरी विषादी पाइएपछि जफत गरिएको विषादी अवशेष द्रूत विश्लेषण प्रयोगशाला एकाइ नवलपुरका नायव प्राविधिक सहायक वीरेन्द्र भण्डारीले बताए । सोमबार उनले बजारमा पठाएको १ सय ५१ किलो काउली बरामद गरी नष्ट गरिएको हो ।

३५ प्रतिशतभन्दा कम विषादी देखिए मात्र उपभोग योग्य हुने वीरेन्द्र भण्डारीले जानकारी दिए । त्यसैगरी, केही दिनअघि रजहरकै अर्का किसान महमत अन्सुरले बिक्रीका लागि बजार पठाएको काउलीमा पनि विषादी देखिएपछि नष्ट गरिएको थियो । उनले उत्पादन गरेको काउली सोमबार परीक्षण गर्दा अझै ४१.४१ प्रतिशत विषादी देखिएपछि अझै केही दिन नटिप्न भनिएको छ ।

यसअघि, बजारमा बोडी र काँक्रोमा पनि विषादी भेटिएपछि नष्ट गरिएको थियो । कावासोतीमा गत वर्ष विषादी अवशेष द्रूत विश्लेषण प्रयोगशाला एकाइ स्थापना गरिएपछि बजारमा आएका तरकारीहरु बिहान ६ बजे संकलन गरी ८ बजेभित्र रिपोर्ट आएपछि विषादी देखिएका तरकारीहरु जफत गरी नष्ट गर्ने गरिएको छ ।

हुप्सेकोटमा उत्पादित काँक्रो र देवचुलीको रहजरमा उत्पादिन काउलीमा विषादी देखिएपछि सम्बन्धित पालिकाका कृषि शाखालाई कृषकसँग सचेतना कार्यक्रम गर्न आग्रह गरिएको भण्डारीले जानकारी दिए ।