जिल्लाका दुई फरक ठाउँमा विद्युत सर्टका कारण आगलागी हुँदा ठूलो धनमाल क्षति भएको छ । धनमाल क्षति भएपनि मानवीय क्षति नभएको प्रहरीले जनाएको छ ।

अर्जुनचौपारी गाउँपालिका–५ काउरेमा शनिबार दिउँसो करिब ३ बजे कुलबहादुर विकको ढुङ्गा–माटोले बनेको जस्ताले छाएको दुईतले कच्ची घरमा करेन्ट सर्ट भई आगलागी भएको हो । आगलागीको खबर प्राप्त हुनासाथ खटिएको प्रहरी टोलि र स्थानीयको सहयोगमा साँझ पाँच बजे आगो पूर्ण रूपमा नियन्त्रणमा लिइएको प्रहरीले जनाएको छ ।

आगलागीबाट घरसहित जस्ताको छानो भएको भान्सा पूर्ण रूपमा जलेर नष्ट भएको र भान्सामा राखिएको धान करिब ७ मुरी, मकै ५ मुरी, कोदो ९ मुरी, घरभित्र रहेको ४ तोला सुन र नगद १ लाख ६० हजार रुपैयाँ जलेर नष्ट हुँदा करिब ३५ लाख रुपैयाँ बराबरको क्षति भएको प्रारम्भिक अनुमान रहेको प्रहरी निरीक्षक कमल नेपालीले जानकारी दिए । उनका अनुसार घटनापछि तीन जनाको परिवार आफन्तको घरमा बस्दै आएको छ ।

यस्तै, आइतबार बिहान स्याङ्जा सदरमुकाम नजिकै पुतलीबजार नगरपालिका–१० सुम्रेखोलामा पनि करेन्ट सर्टकै कारण आगलागी भएको छ । स्थानीय शालिकराम अर्यालको एकतले पक्की घरको सटर कोठामा सञ्चालनमा रहेको अतिरिक्त हुलाक सेवाको कार्यालय र सोही स्थानको किराना पसलमा बिहान करिब ५ बजे आगलागी भएको हो ।

खबर प्राप्त हुनासाथ प्रहरी टोली र नगरपालिकाको दमकल खटी करिब ३५ मिनेटको प्रयासपछि बिहान साढे ५ बजे आगो पूर्ण रूपमा नियन्त्रणमा लिइएको प्रहरीले जनाएको छ । यस घटनामा पनि मानवीय क्षति नभएको र क्षतिको विवरण संकलन कार्य भइरहेको जिल्ला प्रहरी कार्यालय स्याङ्जाले जनाएको छ ।