जिल्ला प्रहरी कार्यालय स्याङ्जाले लामो समयदेखि फरार रहेका दुई प्रतिवादीहरूलाई पक्राउ गरेको छ । वैदेशिक रोजगारी ठगी मुद्दामा लामो समयदेखि फरार रहेकी एक महिलालाई २७ वर्षपछि पक्राउ गरिएको हो ।

वैदेशिक रोजगारी ठगी मुद्दामा जिल्ला अदालत स्याङ्जाले २०५५ साल जेठ २५ गते फैसला सुनाएपछि फरार रहेकी पुतलीबजार नगरपालिका –९ की ७० वर्षीया कृष्ण कुमारी गुरुङलाई मङ्गलबार पक्राउ गरिएको जिल्ला प्रहरी कार्यालय स्याङ्जाका प्रहरी निरीक्षक कमल नेपालीले जानकारी दिए । अदालतले गुरुङलाई ९९ हजार १५० रुपैयाँ जरिवाना तिराउने फैसला गरेको थियो ।

यसैगरी, हाडनाता करणी मुद्दामा फरार रहेकी अर्की एक महिलालाई २५ वर्षपछि पक्राउ गरिएको छ । हाडनाता करणी मुद्दामा स्याङ्जा जिल्ला अदालतले २०५७ साल वैशाख २१ गते तीन महिनाको कैद सजाय सुनाएसँगै फरार रहेकी फेदिखोला गाउँपालिका –२ की ५० वर्षीया सावित्री खड्का भन्ने सापकोटालाई पक्राउ गरी अदालतमा उपस्थित गराइएको प्रहरी निरीक्षक नेपालीले बताए ।

प्रहरी निरीक्षक नेपालीका अनुसार विशेष अप्रेशन टोलीले उनीहरूलाई पक्राउ गरी अदालतको फैसलाअनुसार गुरुङलाई जरिवाना भुक्तानीको प्रक्रिया अगाडि बढाएको छ भने सापकोटालाई कैद भुक्तानीका लागि जिल्ला कारागार स्याङ्जा चलान गरिएको छ ।

प्रहरीले फरार प्रतिवादीहरूलाई खोजी गरी कानुनी दायरामा ल्याउने अभियानलाई निरन्तरता दिइने जनाएको छ ।