पाँचौ संस्करणका च्याम्पियन नेपाली सेनाका धावक करण रावलले छैटौँ संस्करणको क्रसकन्ट्री दौडमा पनि आफ्नो वर्चस्व कायम राखेका छन् । ‘स्वास्थ्यका लागि दौड, राष्ट्रका लागि दौड’ भन्ने नारासहित सात सय कोल्मा बहाकोट सम्पर्क मञ्चले आयोजना गरेको प्रतियोगितामा रावलले २५ किलोमिटर दूरी एक घण्टा २७ मिनेट ३० सेकेन्डमा पूरा गर्दै उपाधि जितेका हुन् । यससँगै उनले आफ्नै अघिल्लो रेकर्ड २२ सेकेन्डले तोडेका छन् ।

मङ्गलबार सम्पन्न दौडमा नेपाली सेनाकै अर्जुन बुढाले एक घण्टा २९ मिनेट १८ सेकेन्डमा दूरी पूरा गर्दै दोस्रो स्थान हासिल गरेका छन् भने संखुवासभाका तेन्जिङ शेर्पाले एक घण्टा ३१ मिनेट १७ सेकेन्डमा दूरी पार गरी तेस्रो भएका छन् । पहिलो, दोस्रो र तेस्रोले क्रमशः ५०, ४० र ३० हजार रुपैयाँ नगदसहित ट्रफी, मेडल र प्रमाणपत्र प्राप्त गरेका छन् ।

२१ वर्षमुनिका पुरुषतर्फ १० किलोमिटर दौडमा सल्यानका बबिन योगीले ४० मिनेट २१ सेकेन्डमा दूरी पार गर्दै उपाधि जितेका छन् । योगीले २० हजार रुपैयाँसहित मेडल र प्रमाणपत्र प्राप्त गरेका छन् । कपिलवस्तुका अजय पाण्डे क्षेत्री ४१ मिनेट ४४ सेकेन्डका साथ दोस्रो र बागलुङका बादल कार्की ४३ मिनेट ४२ सेकेन्डमा तेस्रो भएका छन् । उनीहरूलाई क्रमशः १५ हजार र १० हजार रुपैयाँसहित मेडल र प्रमाणपत्र प्रदान गरिएको छ ।

यसैगरी, खुला महिलातर्फ १० किलोमिटर क्रसकन्ट्री दौडमा नेपाली सेनाकी सिर्जना पाण्डेले ५० मिनेट २६ सेकेन्डमा दूरी पूरा गर्दै पहिलो स्थान हासिल गरेकी छन् । उनले २० हजार रुपैयाँसहित मेडल र प्रमाणपत्र प्राप्त गरेकी छन् । उपविजेता दैलेखकी द्रोपता कुमारी कठायतले ५६ मिनेट १५ सेकेन्डमा दौड पूरा गर्दै १५ हजार रुपैयाँ र ५९ मिनेट ३७ सेकेन्डका साथ तेस्रो बनेकी भोजपुरकी अनिता राईले १० हजार रुपैयाँसहित मेडल र प्रमाणपत्र पाएको मञ्चका महासचिव जीवनप्रसाद पोख्रेलले जानकारी दिए ।

विद्यार्थी पाँच किलोमिटर दौडमा छात्रतर्फ रोशन साङ्ताङ प्रथम, सुजन कार्की द्वितीय र विशाल राना तृतीय भएका छन् भने छात्रातर्फ एन्जिला जिटी प्रथम, सपना परियार द्वितीय र रोशनी नेपाली तृतीय बनेका छन् । रिले दौडमा छात्र-छात्रा दुवैतर्फ पहिलो, दोस्रो र तेस्रो हुनेले क्रमशः आठ हजार, पाँच हजार र तीन हजार रुपैयाँ प्राप्त गरेका छन् ।

साथै, रन फर फनतर्फ ३० वर्ष माथिका महिलाको लुङ्गी दौडमा सरिता बुढा मगर प्रथम, नेत्र कुमारी पौडेल दोस्रो र बालकुमारी भट्टराई तेस्रो बनेकी छन् । उनीहरूले क्रमशः पाँच, तीन र दुई हजार रुपैयाँ प्राप्त गरेका छन् ।

प्रतियोगिताका विजेतालाई गण्डकी प्रदेश सरकारका सामाजिक विकास, युवा तथा खेलकुद मन्त्री विन्दु कुमार थापाले पुरस्कार वितरण गरेका थिए । पुरस्कार वितरण गर्दै मन्त्री थापाले यस्ता प्रतियोगिताले स्वस्थ जीवनशैली प्रवर्द्धन गर्नुका साथै युवाको सक्रिय सहभागिता र स्थानीय खेलकुद संस्कृतिको विकासमा महत्त्वपूर्ण योगदान पुर्‍याउने बताए । उनले युवा, खेलकुद र स्थानीय प्रवर्द्धनका लागि गण्डकी प्रदेश सरकार आवश्यक सहकार्य र सहयोगमा निरन्तर प्रतिबद्ध रहेको बताए ।

ग्रामीण क्षेत्रमा पनि राष्ट्रिय स्तरका खेलकुद प्रतियोगिता आयोजना सम्भव छ भन्ने सन्देश दिनुका साथै खेलकुद पूर्वाधार निर्माण र पर्यटन प्रवर्द्धनमा टेवा पुर्‍याउने उद्देश्यले प्रतियोगिता आयोजना गरिएको आयोजकले जनाएको छ ।

क्रसकन्ट्री दौडमा सहभागी भएर दोस्रोपटक २५ किलोमिटर दौडमा उपाधि जित्न पाउँदा खुसी लागेको प्रतिक्रिया दिँदै रावलले आगामी संस्करणमा पनि सहभागिता जनाउने इच्छा व्यक्त गरेका छन् ।

२५ किलोमिटर दौड प्रतियोगिता पुतलीबजार नगरपालिका –९ स्थित कोल्मा बराहचौरबाट सुरु भई काहुले, डाँडास्वारा, नाम्चे, काल्खु, खल्लुवोट, बिसाउना, खुदी, मङ्किना हुँदै पुनः कोल्मा बराहचौरमै पुगेर समापन भएको थियो ।

१० किमि दौड पनि बराहचौरबाट सुरु भई सतीडाँडा, काहुले, ज्यामीरे, चिरुवा, भैंसेगौंडा, राङ्भाङ मैदान हुँदै बराहचौर र ५ किमि दौड बराहचौरबाट पोखरीछाप, थुम्कीडाँडा, बाँस्पानी, रामचौतारा हुँदै पुनः बराह चौरमै टुंगिएको थियो ।

प्रतियोगितामा २५ किलोमिटरमा २० जना, १० किलोमिटर पुरुषमा ६५, महिलामा १०, पाँच किलोमिटर छात्रमा ६५, छात्रातर्फ २१ र रन फर फनमा १३ जना खेलाडी सहभागी भएको आयोजकले जनाएको छ ।