आगामी फागुन २१ गते हुने प्रतिनिधिसभा निर्वाचनलाई लक्षित गर्दै स्याङ्जा जिल्लामा निर्वाचन सुरक्षाका लागि दुई हजार १२६ जना निर्वाचन प्रहरी भर्ना गरिने भएको छ । जिल्ला प्रहरी कार्यालय स्याङ्जाको निर्वाचन प्रहरी भर्ना, छनौट तथा नियुक्ति समितिले बिहीबार यससम्बन्धी सूचना सार्वजनिक गरेको हो ।

यसअघि निर्वाचनका बेला खटाइने सुरक्षाकर्मीलाई ‘म्यादी प्रहरी’ भनिँदै आएकोमा यसपटक भने ‘निर्वाचन प्रहरी’ नाम दिइएको छ । निर्वाचन प्रहरी भर्ना, छनोट, नियुक्ति तथा परिचालनसम्बन्धी एकीकृत कार्यविधि २०८२ अनुसार माघ १ गतेसम्म आवेदन दिन सकिने व्यवस्था गरिएको छ । इच्छुकले जिल्ला प्रहरी कार्यालय स्याङ्जाबाट फारम लिई आवेदन दर्ता गराउन सक्नेछन् ।

दरखास्त दिने उम्मेदवारले फारम दर्ता गर्ने अन्तिम मितिसम्म १८ वर्ष पूरा भई ५४ वर्ष ननाघेको हुनुपर्ने जिल्ला प्रहरी कार्यालय स्याङ्जाका प्रहरी निरीक्षक कमल नेपालीले जानकारी दिए । साथै नेपाली नागरिक हुनुपर्ने, सामान्य लेखपढ गर्न जान्ने, कुनै फौजदारी अभियोगमा सजाय नपाएको, भर्नाका बेला कुनै राजनीतिक दलको सदस्य नभएको तथा शारीरिक र मानसिक रूपमा स्वस्थ हुनुपर्ने शर्त तोकिएको छ ।

सूचनाअनुसार नेपाली सेना, नेपाल प्रहरी, सशस्त्र प्रहरी बल नेपाल, विदेशी मित्र राष्ट्रका सुरक्षा निकायबाट सेवा निवृत्त पूर्वसुरक्षाकर्मी तथा पूर्व वन रक्षक, साथै २०८१ माघ १ देखि २०८२ पुस मसान्तसम्म नेपाली सेना, नेपाल प्रहरी तथा सशस्त्र प्रहरी बल नेपालमा विभिन्न पदमा भर्नाको लागि आवेदन दिई शारीरिक तन्दुरुस्ती र स्वास्थ्य परीक्षणमा उत्तीर्ण भएकालाई प्रवेश पत्रका आधारमा प्राथमिकता दिइनेछ । यसअघि प्रतिनिधिसभा, प्रदेशसभा तथा स्थानीय तहका निर्वाचनमा म्यादी प्रहरीका रूपमा काम गरी सन्तोषजनक कार्यसम्पादन गरेका व्यक्तिलाई समेत प्राथमिकतामा राखिएको छ ।

आवेदकको प्रारम्भिक छनोट माघ ५ देखि ९ गतेसम्म गरिनेछ भने अन्तिम नतिजा माघ १२ गते प्रकाशित हुने जनाइएको छ । छनोटमा परेका निर्वाचन प्रहरीलाई माघ १५ देखि २४ गतेसम्म तालिम तथा प्रशिक्षण दिइने छ ।

नियुक्ति पाएका निर्वाचन प्रहरीले ४० दिन वा सरकारले तोकेको अवधिसम्म काम गर्नुपर्नेछ । पारिश्रमिकतर्फ प्रहरी जवानको सुरु तलब स्केलअनुसार प्रतिदिन ८ सय ६९ रुपैयाँ ४० पैसाका दरले ४० दिनको जम्मा ३४ हजार ७ सय ७६ रुपैयाँ पाउनेछन् । साथै ४० दिनका लागि खाद्यान्न बापतको रकम, निर्वाचन स्थलसम्म आउजाउका लागि तोकिएको यात्रा खर्च तथा खाजा खर्चसमेत उपलब्ध गराइनेछ ।