स्याङ्जाको बिरुवा गाउँपालिकामा रहेको एक विकास बैंकमा कार्यरत सुरक्षा गार्डमाथि बैंक परिसरमै चक्कु प्रहार भएको छ । बिरुवा गाउँपालिका–१ स्थित गरिमा विकास बैंक लिमिटेडमा ड्युटीमा रहेका सुरक्षा गार्ड शेरबहादुर थापामाथि मंगलबार बिहान आक्रमण भएको हो ।

प्रहरीका अनुसार चक्कु प्रहार गर्ने आरोपमा सोही स्थानका ३० वर्षीय महेन्द्र नारायण श्रेष्ठलाई नियन्त्रणमा लिइएको छ । श्रेष्ठलाई ज्यान मार्ने उद्योग कसुरमा स्याङ्जा जिल्ला अदालतबाट सात दिनको म्याद थप गरी थप अनुसन्धान अघि बढाइएको जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक प्रसन्नराज चौधरीले जानकारी दिए ।

घटनामा घाइते भएका थापाको अवस्था सामान्य रहेको प्रहरीले जनाएको छ । आफू माथि एक्कासी अन्धाधुन्ध चक्कु प्रहार भए पनि सेवा निवृत्त सेना भएकाले जोगिन सफल भएको थापाले बताएका छन् ।

घटना भए पनि बैंकको सेवा भने प्रभावित नभएको बैंकले जनाएको छ । प्रहरीको सहयोगमा बैंकको कामकाज नियमित रूपमा सञ्चालन भइरहेको गरिमा विकास बैंकका क्षेत्रीय प्रबन्धक प्रेमकिशोर अर्यालले बताए । उनले अवस्था सामान्य रहेको र सेवाग्राहीलाई ढुक्क भएर सेवा लिन आग्रह समेत गरेका छन् ।