प्रतिनिधिसभा सदस्य निर्वाचनअन्तर्गत स्याङ्जामा यसपटक पनि ठूलो संख्यामा मत बदर भएको पाइएको छ । जिल्लाका दुवै निर्वाचन क्षेत्रको मतगणना सकिँदा कुल ५ हजार ५७० मत बदर भएको तथ्याङ्क सार्वजनिक भएको छ ।

जिल्ला निर्वाचन कार्यालय स्याङ्जाका अनुसार क्षेत्र नम्बर १ र २ गरी यति ठूलो संख्यामा मत बदर भएको हो । मतदाता शिक्षाका लागि विभिन्न वडामा स्वयंसेवक परिचालन गरेर कार्यक्रम सञ्चालन गरिए पनि बदर मतको संख्या अपेक्षाअनुसार घट्न सकेन ।

जिल्ला निर्वाचन अधिकारी श्रीराम थापाका अनुसार क्षेत्र नम्बर १ मा २ हजार ९०८ मत बदर भएको छ भने क्षेत्र नम्बर २ मा २ हजार ६६२ मत बदर भएको छ ।

क्षेत्र नम्बर १ मा कुल १ लाख ३० हजार ८८६ मतदाता रहेकामा ७० हजार ९४४ मत खसेको थियो । त्यसमध्ये ६८ हजार ३६ मत मात्र सदर भएको निर्वाचन कार्यालयले जनाएको छ ।

त्यस्तै, क्षेत्र नम्बर २ मा कुल १ लाख १७ हजार ९३० मतदाता रहेकामा ६४ हजार ९२८ मत खसेको थियो । त्यसमध्ये ६२ हजार २६६ मत मात्र सदर भएको छ ।

मतपत्रमा एकभन्दा बढी चुनाव चिह्नमा छाप लगाउने, तोकिएको स्थानभन्दा बाहिर छाप लगाउने वा खाली मतपत्र खसाल्ने जस्ता कारणले धेरै मत बदर भएको अधिकारी थापाले बताए ।

यसपटक मतदाता शिक्षा अभियान सञ्चालन गरिएको भए पनि बदर मतको संख्या अझै उल्लेख्य देखिएको भन्दै आगामी निर्वाचनमा यसतर्फ थप ध्यान दिनुपर्ने सरोकारवालाको भनाइ छ ।