प्रतिनिधिसभा सदस्य निर्वाचनपछि स्याङ्जामा लुकेर मतदान गर्न आएका फरार कसूरदारहरूलाई प्रहरीले पक्राउ गरेको छ ।

अदालतबाट फैसला भइसकेका तर कैद तथा जरिवाना भुक्तान नगरी फरार रहेका व्यक्तिहरूलाई विशेष अभियानमार्फत नियन्त्रणमा लिइएको जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक प्रसन्न राज चौधरीले जानकारी दिए ।

निर्वाचनलाई लक्षित गर्दै तयार पारिएको पूर्व रणनीतिअनुसार मतदानपछि विभिन्न स्थानमा खटिएको प्रहरी टोलीले फरार रहेका चार जनालाई पक्राउ गरेको डिएसपी चौधरीले बताए । पक्राउ परेकालाई निर्वाचनकै दिन अर्थात् फागुन २१ गते नियन्त्रणमा लिइ कैद भुक्तान तथा जरिवाना असुलका लागि फागुन २५ गते जिल्ला अदालत स्याङ्जामा पेश गरिएको प्रहरीले जनाएको छ ।

पक्राउ पर्नेमा अर्जुनचौपारी गाउँपालिका–५ तालपोखरीबाट ४० वर्षीय प्रेमबहादुर दर्जी रहेका छन् । कर्तव्य ज्यान मुद्दामा उनलाई २० वर्ष कैद सजाय तोकिएको थियो ।

यस्तै, पुतलीबजार नगरपालिका–५ कटुन्जेचौरबाट ५८ वर्षीय बुद्धिमान शाही पक्राउ परेका छन् । बैंकिङ कसूरसम्बन्धी दुई फरक मुद्दामा उनलाई क्रमशः दुई दिन र एक दिन कैद तथा एक लाख ६३ हजार र एक लाख रुपैयाँ जरिवाना तोकिएको थियो ।

त्यसैगरी, आँधीखोला गाउँपालिका–४ सेपत सिरानचौरबाट ७४ वर्षीय रामबहादुर कामी पक्राउ परेका छन् । बहुविवाह मुद्दामा उनलाई दुई वर्ष पाँच महिना १३ दिन कैद र २५ हजार रुपैयाँ जरिवाना तोकिएको थियो ।

प्रहरीले अदालतको फैसला कार्यान्वयनलाई प्रभावकारी बनाउन फरार कसूरदार खोजी अभियानलाई निरन्तरता दिइने जनाएको छ ।