बुवाको हत्या आरोपमा स्याङ्जाको पुतलीबजार नगरपालिका–७ बाचपुरका एक युवकलाई कारागार चलान गरिएको छ ।

पुतलीबजार–७ बाचपुरका ३६ वर्षीय तोरण कार्कीलाई ७१ वर्षीय बुवा तुलबहादुर कार्कीको हत्या आरोपमा पुर्पक्षका लागि जिल्ला कारागार स्याङ्जा पठाइएको प्रहरी निरीक्षक अमृत त्रिपाठीले जानकारी दिए ।

उनका अनुसार फागुन २ गते राति खाना खाएर आफ्नै कोठामा सुतेका तुलबहादुर कार्की भोलिपल्ट फागुन ३ गते बिहान मृत अवस्थामा फेला परेका थिए । घटनापछि प्रहरीले घटनाको सूक्ष्म अनुसन्धान थालेको थियो ।

अनुसन्धानका क्रममा मृतकका साइलो छोरा तोरण कार्कीको संलग्नता देखिएपछि उनलाई सोही दिन बाचपुरबाट पक्राउ गरिएको थियो । पक्राउपछि कर्तव्य ज्यान मुद्दामा अनुसन्धान अघि बढाइएको प्रहरीले जनाएको छ ।

अनुसन्धान प्रक्रिया पूरा गरी फागुन २८ गते स्याङ्जा जिल्ला अदालतमा पेश गरिएकोमा अदालतको आदेशअनुसार तोरणलाई पुर्पक्षका लागि जिल्ला कारागार स्याङ्जा चलान गरिएको प्रहरी निरीक्षक त्रिपाठीले बताए ।