राष्ट्रिय लोक तथा दोहोरीगीत प्रतिष्ठान नेपालले स्थापना भएको २५ वर्ष पूरा भएको अवसरमा देशभर विविध कार्यक्रम आयोजना गरेको छ । विक्रम संवत् २०५८ सालमा स्थापना भएको प्रतिष्ठानले शुक्रबार रजत वर्षका अवसरमा विभिन्न सामाजिक तथा सांस्कृतिक गतिविधि सञ्चालन गरेको हो ।

यसैक्रममा प्रतिष्ठानको स्याङ्जा शाखाले पनि विशेष कार्यक्रम आयोजना गर्दै वार्षिकोत्सव मनाएको छ । पुतलीबजार नगरपालिका–१४ लामागेस्थित पाणिनी गुरुकुलम् आश्रम परिसरमा आयोजित कार्यक्रममा सहयोग हस्तान्तरण, वृक्षारोपण, स्रष्टा सम्मान तथा सांगीतिक प्रस्तुति गरिएको थियो ।

कार्यक्रमका क्रममा प्रतिष्ठानले गुरुकुललाई संस्थागत सहयोगस्वरूप नगद २० हजार रुपैयाँ प्रदान गरेको छ । गुरुकुलमा अध्ययनरत विद्यार्थीहरूको शैक्षिक तथा संस्थागत गतिविधिलाई सहयोग पुग्ने उद्देश्यले उक्त रकम हस्तान्तरण गरिएको प्रतिष्ठानका अध्यक्ष जगत गौडेलले बताए ।

कार्यक्रम उद्घाटन गर्दै प्रतिष्ठानका केन्द्रीय सचिव घनश्याम रिजालले प्रतिष्ठानले आफ्नो स्थापना दिवस देशभर विभिन्न सामाजिक तथा सांस्कृतिक गतिविधिमार्फत मनाएको बताए । कलाकारहरूले आफ्नो आम्दानीबाट केही अंश छुट्याएर समाजप्रति जिम्मेवारी बहन गर्ने प्रयास गर्नु सराहनीय रहेको उनले उल्लेख गरे ।

संस्थाले लोक संस्कृतिको संरक्षण, स्रष्टाको सम्मान र नयाँ प्रतिभालाई प्रोत्साहन गर्ने उद्देश्यलाई निरन्तर अगाडि बढाइरहेको उनले बताए ।

यस अवसरमा नेपाली मौलिक बाजा संरक्षणमा योगदान पुर्‍याउने कलाकारलाई पनि सम्मान गरिएको थियो । पञ्चेबाजाअन्तर्गत सहनाई वादनमा लामो समयदेखि सक्रिय पुतलीबजार–१४ का ७० वर्षीय हरि बहादुर दर्जीलाई सम्मानपत्र र दोसल्लासहित सम्मान गरिएको हो । दर्जी लामागे नौमति बाजा समूहका संयोजकका रूपमा सक्रिय रहँदै आएका छन् ।

उनी विभिन्न लोकदोहोरी एल्बमहरूमा समेत सहनाई वादनका लागि परिचित छन् । लोक संगीतमा मौलिक बाजाको संरक्षण र प्रवर्द्धनमा पुर्‍याएको योगदानको कदर गर्दै उनलाई सम्मान गरिएको अध्यक्ष गौडेलले जानकारी दिए ।

कार्यक्रमका अवसरमा गुरुकुल परिसरमा वृक्षारोपणसमेत गरिएको थियो । २०७० सालमा स्थापना भएको पाणिनी गुरुकुलम् आश्रममा हाल विभिन्न जिल्लाबाट आएका करिब २० जना बटुक अध्ययनरत छन् ।