स्याङ्जाको भीरकोट नगरपालिका स्थित भीरकोट नगर अस्पतालमा शनिबार सञ्चालन गरिएको एकदिने निःशुल्क स्वास्थ्य शिविरबाट झण्डै पाँच सय सेवाग्राही लाभान्वित भएका छन् ।

भीरकोट नगरपालिका र मनमोहन मेमोरियल मेडिकल एण्ड टिचिङ हस्पिटलको संयुक्त आयोजनामा भएको शिविरमा ४ सय ९५ जनाले स्वास्थ्य सेवा लिएको अस्पतालले जनाएको छ ।

अस्पतालका अनुसार शिविरबाट ३ सय ४२ महिला र १ सय ५३ पुरुषले सेवा लिएका हुन् । अर्जुनचौपारी गाउँपालिका, भीरकोट र पुतलीबजार नगरपालिका क्षेत्रका स्थानीय बासिन्दा शिविरबाट प्रत्यक्ष लाभान्वित भएका थिए ।

चैत ७ गते बिहानदेखि सुरु भएको शिविर साँझसम्म सञ्चालन गरिएको थियो । बिहानै वर्षा भए पनि सेवाग्राहीको सहभागिता उत्साहजनक रहेको चिकित्सकहरूले बताएका छन् ।

शिविरमा स्त्री तथा प्रसूति, जनरल मेडिसिन, हाडजोर्नी तथा नशा रोग र नाक, कान, घाँटीसम्बन्धी रोगको निःशुल्क परीक्षण तथा परामर्श सेवा प्रदान गरिएको थियो । विभिन्न क्षेत्रका विशेषज्ञ चिकित्सकहरूले बिरामी जाँच र उपचारमा सक्रिय सहभागिता जनाएका थिए ।

नगर प्रमुख गोविन्दकुमार कर्माचार्यले ग्रामीण क्षेत्रमा बसोबास गर्ने नागरिकलाई सहज रूपमा विशेषज्ञ सेवा उपलब्ध गराउने उद्देश्यले शिविर आयोजना गरिएको बताए । उनले आगामी वर्षहरूमा पनि यस्ता कार्यक्रमलाई निरन्तरता दिने जानकारी दिए ।

शिविरमा सहभागी स्थानीयवासी प्रतीक्षा अर्यालले छोटो समयमै विशेषज्ञ जाँच र निःशुल्क औषधि पाएको अनुभव सुनाउँदै यस्ता कार्यक्रमले गाउँमै स्वास्थ्य सेवा सहज बनाएको बताइन् ।