स्याङ्जाको गल्याङ नगरपालिका–१ राम्दीस्थित सिद्धार्थ राजमार्गमा प्रहरीले चेकजाँचका क्रममा बिलबिनाका खाद्य सामग्री बोकेको मिनी ट्रक नियन्त्रणमा लिएको छ ।

जिल्ला प्रहरी कार्यालय स्याङ्जाका अनुसार बुधबार साँझ अस्थायी प्रहरी चौकी राम्दीबाट खटिएको टोलीले सवारी चेकजाँच गर्ने क्रममा भैरहवाबाट पोखरातर्फ जाँदै गरेको ग १ क ४५३९ नम्बरको मिनी ट्रक रोकेको थियो ।

जाँचका क्रममा ट्रकमा बिलबिना ल्याइएका विभिन्न ब्रान्डका खाद्य सामग्री फेला परेपछि प्रहरीले ती सामान बरामद गरेको हो । ट्रकमा लोड गरिएका सामानहरू आवश्यक कागजात बिना ढुवानी गरिएकोले बरामद गरिएको जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक (डिएसपी) प्रसन्न राज चौधरीले जानकारी दिए ।

बरामद गरिएका सामग्रीमा ३ हजार पिस ओरियो बिस्कुट, २६४ पिस स्मिकर्स मिठाई, ८४० पिस माल्किस्ट बिस्कुट र १८० पिस डेरी मिल्क चकलेट रहेका छन् ।

प्रहरीका अनुसार ती सामानको अनुमानित मूल्य १ लाख ५ सय ६५ रुपैयाँ बराबर रहेको छ ।

बरामद सामानसहित मिनी ट्रक नियन्त्रणमा लिइएको प्रहरीले जनाएको छ । घटनाबारे थप अनुसन्धान तथा आवश्यक कानुनी प्रक्रिया अघि बढाइएको जिल्ला प्रहरी कार्यालय स्याङ्जाले जनाएको छ ।