देशव्यापी संगठन विस्तारको कार्यक्रम अन्तरगत विवेकशील साझा पार्टीले पोखरामा प्रदेशस्तरिय प्रशिक्षण कार्यक्रम गरेको छ । शुक्रबार पोखरामा भएको प्रशिक्षण कार्यक्रममा पार्टीका सबै प्रमुख नेताहरुको उपस्थिती रह्यो ।

संगठन विस्तार तथा प्रशिक्षण कार्यक्रममा पार्टीको सँयोजकद्वय रविन्द्र मिश्र र उज्जवल थापासँगै केन्द्रीय नेताहरु डा. सूर्यराज आचार्य, केशव दाहाल, रञ्जु दर्शना लगाएतको सहभागिता रहेको थियो । कार्यक्रममा विवेकशील साझा पार्टीमा आस्था राख्ने गण्डकी प्रदेशका युवाहरुको उल्लेख्य सहभागिता रहेको थियो ।

प्रशिक्षण कार्यक्रममा सँयोजकद्वय रविन्द्र मिश्र र उज्जवल थापाले विवेकशील साझाको राजनीतिक मूल्य र मान्यताको विषयमा आफ्ना धारणाहरु राखेका थिए । उनीहरुले नेपालमा वैकल्पिक शक्तिको आवश्यकता महशुस भएको र त्यको परिपूर्ती विवेकशील साझाले गर्न सक्ने विचार राखेका थिए ।

त्यस्तै डा. सूर्यराज आचार्यले विवेकशिल साझा पार्टीको राजनीतिक दर्शन र अर्थतन्त्र विषयमा आफ्नो विचार राखेका थिए । अर्का नेता केशव दाहालले नेपालमा वैकल्पिक राजनीतिको औचित्यको बारेमा प्रकाश पार्दै विवेकशील साझा पार्टी अब नेपालको वैकल्पिक पार्टी भसकेको ठोकुवा गरे ।

युवा नेतृ रञ्जु दर्शनाले युवा पुस्ता राजनीति र सामाजिक अभियानको विषयमा बोलिन् । उनले युवापुस्ताबाट मात्रै परिवर्तन सम्भव भएको बताउँदै राजनीतिमा युवा पुस्ताको प्रवेशले विशेष अर्थ राख्ने बताईन् ।

प्रदेशस्तरिय कार्यक्रमको व्यवस्थापनको जिम्मा विवेकशील साझाको जिल्ला कमिटिले गरेको थियो । कार्यक्रममा गण्डकी प्रदेशभित्र पर्ने विभिन्न जिल्लाबाट १ सय जना उत्प्रेरकहरु सहभागी भएको जिल्ला सचिवालयका सदस्य सुरेश पहारीले जानकारी दिए ।

विश्वराज पौडेलले कार्यक्रमको संचालन गरेका थिए । कार्यक्रममा उपस्थित उत्प्रेरकहरुलाई चिरञ्जिवी अधिकारीले स्वागत गरेका थिए भने निर्देश सिलवालले धन्यबाद ज्ञापन गरेका थिए ।

विवेकशील साझा पार्टीका अनुसार शनिबार पार्टीको प्रदेश सँयोजक घोषणा गर्ने कार्यक्रम रहेको छ । उसले यो कार्यक्रम गैह«ापाटनस्थित उद्योग वाणिज्य संघको हलमा गर्ने जनाएको छ । गण्डकी प्रदेश सँयोजक घोषणाका लागि पार्टीले विशेष तयारी गरिरहेको छ । प्रदेश सँयोजकको घोषणालाई लिएर विभिन्न चासो र जिज्ञासाहरु आउन थालेको जिल्ला सचिवालयले जनाएको छ ।