स्याङ्जामा हिंसामा परेका महिलालाई तत्काल संरक्षण र पुनःस्थापनाको व्यवस्था गर्दै सञ्चालन गरिएको अल्पकालीन सेवा केन्द्र प्रभावकारी बन्दै गएको छ । परिवार, समाज वा सडकमा असुरक्षित अवस्थामा पुगेका महिलाका लागि केन्द्र अहिले सुरक्षित आश्रयस्थलका रूपमा स्थापित हुन थालेको हो ।

गण्डकी प्रदेश सरकारअन्तर्गतको एकीकृत सेवा कार्यालय स्याङ्जाले पुतलीबजार नगरपालिकाको संयोजकत्वमा जिल्लाका ११ वटै स्थानीय तहसँग सहकार्य गरेर सेवा केन्द्र सञ्चालनमा ल्याएको हो । केन्द्रमा लैङ्गिक हिंसा, पारिवारिक विवाद तथा बेवारिसे अवस्थामा भेटिएका महिलालाई उद्धार गरी सुरक्षित आश्रय दिने गरिएको छ ।

एकीकृत सेवा कार्यालय स्याङ्जाका प्रमुख जीवन पौडेलका अनुसार हालसम्म २२ जनाले केन्द्रबाट सेवा लिइसकेका छन् । तीमध्ये अधिकांश बलात्कार तथा जबरजस्तीकरणी जस्ता गम्भीर हिंसामा परेका महिला रहेका छन् । केही महिला पारिवारिक हिंसाका कारण आश्रयमा पुगेका छन् भने सडकमा बेवारिसे अवस्थामा भेटिएका महिलालाई समेत केन्द्रले संरक्षण दिएको छ ।

केन्द्रमा बस्ने महिलालाई निःशुल्क खाना, बसोबास, स्वास्थ्य उपचार, कानुनी सहायता र मनोसामाजिक परामर्श उपलब्ध गराइँदै आएको छ । प्रदेश अस्पताल स्याङ्जामा रहेको एकद्वार सङ्कट व्यवस्थापन प्रणालीमार्फत उपचार तथा अन्य आवश्यक सेवा पनि समन्वय गरिने गरिएको कार्यालयले जनाएको छ ।

पुतलीबजार नगरपालिकाकी उपप्रमुख तथा केन्द्रकी संयोजक देवी अर्यालले हिंसामा परेका महिलाको आत्मविश्वास कमजोर हुने भएकाले तत्काल सुरक्षित वातावरण आवश्यक पर्ने बताइन् । उनका अनुसार केन्द्रले पीडितलाई केही समय आश्रय दिएर मनोपरामर्श गर्ने, परिवारसँग पुनर्मिलन गराउने र आवश्यक परे न्यायिक प्रक्रियासम्म सहजीकरण गर्ने काम गरिरहेको छ ।

उनले सेवा केन्द्र प्रभावकारी बन्दै गए पनि अझै धेरै महिलासम्म यसको जानकारी पुग्न नसकेको उल्लेख गर्दै स्थानीय तह र सरोकारवाला निकायले सचेतनामूलक अभियान बढाउनुपर्ने आवश्यकता औँल्याइन् ।