कास्की जिल्लालाई पूर्ण खोप सुनिश्चितता तथा दिगोपन जिल्ला घोषणा गरिएको छ।

पूर्ण खोप सुनिश्चितता निर्देशिका, २०७१ बमोजिम आवश्यक सबै प्रक्रिया पूरा भएपछि बिहीबार जिल्ला समन्वय समिति कास्कीमा आयोजित विशेष समारोहबीच जिल्लालाई पूर्ण खोप सुनिश्चितता तथा दिगोपन घोषणा गरिएको हो।

यसअघि कास्कीका पाँचवटै स्थानीय तह पूर्ण खोप सुनिश्चितता तथा दिगोपन घोषणा भइसकेका थिए। स्थानीय तहहरूले आवश्यक मापदण्ड पूरा गरेपछि जिल्ला स्तरमा पनि घोषणा गरिएको हो।

कार्यक्रममा जिल्ला समन्वय समिति कास्कीका प्रमुख तथा जिल्ला खोप समन्वय समितिका संयोजक लिलाधर पौडेलले अभियान सफल बनाउन योगदान पुर्‍याउने सबै पक्षप्रति आभार व्यक्त गरे । उनले जनप्रतिनिधि, स्वास्थ्यकर्मी, स्वयंसेवक तथा आम नागरिकको सक्रिय सहभागिताबाट मात्र यस्ता जनस्वास्थ्य अभियान सफल हुने बताए ।

उनले स्वस्थ नागरिक नै समृद्ध नेपालको आधार भएको उल्लेख गर्दै बालबालिकाको स्वास्थ्य सुरक्षाका लागि खोप सबैभन्दा प्रभावकारी र भरपर्दो माध्यम भएको धारणा व्यक्त गरे ।

समारोहमा स्वास्थ्य तथा जनसंख्या मन्त्रालयका सचिव डा. युवनिधि बसौला, मन्त्रालयका अतिरिक्त सचिव खिमबहादुर खड्का, जिल्ला समन्वय समिति कास्कीकी उपप्रमुख सरिता माल, जिल्ला खोप समन्वय समितिका सदस्य–सचिव मधुरजी ढकाल तथा जिल्ला समन्वय अधिकारी नवराज बराललगायतले शुभकामना मन्तव्य व्यक्त गरेका थिए ।

कार्यक्रममा पूर्ण खोप अभियान सफल बनाउन उल्लेखनीय योगदान पुर्‍याउने विभिन्न पक्ष तथा सेवा अवकाश प्राप्त महिला स्वास्थ्य स्वयंसेविकाहरूलाई सम्मानसमेत गरिएको थियो।

जिल्ला समन्वय समिति कास्कीका प्रमुख तथा जिल्ला खोप समन्वय समितिका संयोजक लिलाधर पौडेलको अध्यक्षतामा कार्यक्रम सम्पन्न भएको थियो।