स्याङ्जाको सदरमुकाम पुतलीबजार नगरपालिका–१ र वडा नम्बर ३ पुतलीखेत जोड्ने अरौंदी खोला र बाडखोलामा स्थायी पुल नहुँदा स्थानीयवासी वर्षौँदेखि जोखिमपूर्ण यात्रा गर्न बाध्य छन् ।

दुवै खोलामा आवतजावत सहज बनाउन २०६५ सालमा कल्भर्ट निर्माण गरिएको थियो । तर त्यसपछि स्थायी पुल निर्माण नहुँदा वर्षायाममा खोलामा पानीको सतह बढेसँगै कल्भर्टमाथिबाटै पानी बग्ने गरेको छ । यसले पैदलयात्रीदेखि सवारीसाधनसम्मको आवागमन प्रभावित हुने गरेको स्थानीय बताउँछन् ।

अरौंदी खोला र बाडखोला हुँदै पुतलीबजार सदरमुकाम, प्रदेश अस्पताल तथा विभिन्न सरकारी कार्यालयमा दैनिक सयौँ नागरिक आवतजावत गर्छन् । तर वर्षा भएपछि यही मुख्य मार्ग जोखिमपूर्ण बन्ने गरेको छ ।

गत वर्ष अरौंदी खोलामा आएको बाढीले स्कुटर बगाउँदा चालकको मृत्यु भएको थियो । त्यस्तै बाडखोलाले ट्र्याक्टर बगाउँदा चालक बेपत्ता भएका थिए । वर्षायाममा हरेक वर्षजसो जोखिम बढ्ने र दुर्घटनासमेत हुने गरे पनि स्थायी समाधान हुन नसकेको स्थानीयको गुनासो छ ।

स्थानीयवासीले दुवै खोलामा स्थायी पुल निर्माणका लागि पटक–पटक सम्बन्धित निकायको ध्यानाकर्षण गराउँदै आएका छन् । वर्षायाममा हुने जोखिम रोक्न तत्काल पुल निर्माण गर्नुपर्ने उनीहरूको माग छ ।

पुतलीबजार नगरपालिकाका प्रमुख तुलसीराम रेग्मीले पुल निर्माण आवश्यक रहेको भन्दै त्यसका लागि नगरपालिकाले पहल गरिरहेको बताए । उनका अनुसार पुल निर्माणका लागि आवश्यक प्रक्रिया अघि बढाइए पनि पर्याप्त बजेट अभावका कारण काम सुरु गर्न नसकिएको हो ।

वर्षायाममा खोलामा पानीको बहाव बढ्दा कल्भर्टबाट आवतजावत गर्नसमेत जोखिम हुने भएकाले दीर्घकालीन समाधानका लागि स्थायी पुल निर्माण आवश्यक रहेको नगर प्रमुख रेग्मीले बताए ।