पोखरा-५, पर्स्याङस्थित शान्ति निकेतन स्कूलले प्राकृतिक विपत्तिबाट प्रभावित नागरिकहरूको उद्धार, राहत तथा पुनर्स्थापनाका लागि प्रधानमन्त्री दैवी प्रकोप उद्धार कोषमा ५० हजार रुपैयाँ आर्थिक सहयोग हस्तान्तरण गरेको छ।

विद्यालयले आफ्नो सामाजिक उत्तरदायित्व र सङ्कटको समयमा समुदायलाई सहयोग गर्ने प्रतिबद्धता स्वरूप उक्त रकम प्रदान गरेको हो।

देशका विभिन्न भागमा आएको विनाशकारी बाढी तथा अन्य प्राकृतिक विपत्तिबाट प्रभावित परिवार र व्यक्तिहरूलाई राहत पुगोस् भन्ने उद्देश्यले सहयोग गरिएको विद्यालयका प्राचार्य डा. महेश्वर पराजुलीले जानकारी दिए ।

राहत तथा पुनर्स्थापना कार्यलाई प्रभावकारी बनाउन शैक्षिक संस्था, संघ-संस्था र व्यक्तिगत स्तरबाट हुने सामूहिक प्रयासले महत्वपूर्ण भूमिका खेल्ने धारणा डा. पराजुलीले व्यक्त गरे ।

विद्यालयले विपद्‌बाट प्रभावितहरूप्रति सहानुभूति प्रकट गर्दै बेपत्ता तथा प्रभावित नागरिकहरूको शीघ्र उद्धार र पुनर्स्थापनाको कामना गरेको छ। साथै, आगामी दिनहरूमा पनि सामाजिक तथा मानवीय कार्यहरूमा निरन्तर योगदान पुर्‍याउने प्रतिबद्धता शान्ति निकेतन स्कूलले व्यक्त गरेको छ।