श्यामशितल परियार,लमजुङ । लमजुङमा पहिलो पटक पालिकास्तरिय भलिवल प्रतियोगिता हुने भएको छ । जिल्ला भलिवल संघ लमजुङको आयोजनामा आउँदो मंसिर दोश्रो साता भलिवल प्रतियोगिता हुन हुने भएको हो ।

प्रतियोगिता आउँदो मंसिर १४ देखि १६ गतेसम्म बेसीशहरको फुलबारी मञ्चमा सञ्चालन हुनेछ । बेसीशहरमा पत्रकार भेटघाट कार्यक्रमको आयोजना गरी यस्तो जानकारी गराइएको हो । प्रतियोगितामा जिल्लाका ४ नगरपालिका र ४ गाउँपालिका गरी ८ वटै स्थानीय तहका खेलाडीको सहभागिता रहनेछ ।

जिल्ला भलिवल संघ लमजुङका अध्यक्ष दिवाकर बरालले जिल्लामै पहिलो पटक सञ्चालन हुन लागेको पालिकास्तरिय भलिवल प्रतियोगिताले भलिवल खेलको विकास गर्न सहयोग पुग्ने उल्लेख गरेका छन । उनका अनुसार पछिल्लो समय भलिवल खेलमा युवाहरुको आकर्षण बढ्दो छ ।

प्रतियोगिताले लुकेर बसेका खेल प्रतिभालाई उजागर गर्न सहयोग पुर्याउने समेत उनले बताए । उनका अनुसार प्रतियोगितामा प्रथम हुने टिमले नगद ५० हजार, मेडल र प्रमाणपत्र पाउनेछन् । दोस्रो हुनेले नगद २५ हजार, मेडल र प्रमाणपत्र पाउनेछन् ।

सान्त्वना स्वरुप दुई खेल समूहलाई भने नगद १०/१० हजार रुपैयाँ, मेडल र प्रमाणपत्र प्रदान गरिने गरिने आयोजकले जनाएको छ ।