पोखरा, २२ मंसिर । कवि सरस्वति प्रतिक्षाले विहिबार साँझपख पुर्वपतिसँगै बसेको एउटा फोटो र दुई लाईन स्टाटस फेसवुकमा पोष्ट गरिन् । केही मलिन र अलिकति मात्रै खुशीजस्तो देखिने तस्विरको सिरानमा यस्तो स्टाटस थियो–‘सम्बन्ध बिच्छेद गरेको आजबाट ठिक तीन वर्ष पूरा भएर चार वर्ष लागेको उपलक्ष्यमा ठाकुरजीसँग भेटेर लन्च गरियो । सम्बन्ध बिच्छेदपछि आ–आफूले बाँचेको जीवनको समीक्षा पनि गरियो । सेलिब्रेट गर्न जान्यो भने सम्बन्ध बिच्छेद समेत एक उत्सव बनिदिदो रहेछ ।’

उनको यो फोटो र स्टाटसमा धेरैले धेरै किसिमको कमेण्ट गरेका छन् । फेसवुकमै ११ सय भन्दा बढी कमेण्ट र ३ हजार भन्दा बढी लाईक तथा ५ सय हाराहारीमा शेयर भएका छन् । उनको यो फोटोमा अधिकांशले आश्चर्य देखाएका छन्, केही नमूना उदाहरण ठानेका छन् भने केहीले चाहीँ गाली गरेर प्रतिक्रिया दिएका छन् ।

नेपालमा लगभग पहिलो नै मान्नुपर्छ, पूर्वपतिसँग लञ्च गरेर खुशीसाथ स्टाटस र फेसवुक पोष्ट गरेको यो घटना । सम्वन्ध विच्छेद गरेका जोडीहरु हम्मेसी आपसमा भेट हुन चाहँदैनन् । डेट गर्ने त निकै टाढाको कुरा । उनीहरु एक–अर्काप्रति अनेक तुष पालेर बसेका हुन्छन् । तर, साहित्यकार सरस्वती प्रतीक्षा यसमा अपवाद देखिइन् ।

सरस्वती थकाली बाबु र बाहुनी आमाकी छोरी हुन् । बाबुआमाजस्तै उनले पनि अन्तरजातीय विवाह गरेकी थिइन् । उनलाई पोखराका प्रख्यात साहित्यकार सरुभक्तले ०५५ सालमा धर्मपुत्री बनाएका थिए । उनी आफूलाई जन्मदिने पिताभन्दा धर्मपितालाई महत्व दिन्छिन् ।

सरस्वती र ठाकुरका एक छोरा छन् । श्रीमानसँग डिभोर्सपछि आफ्नो हिस्साको सम्पत्ति लिएर सरस्वती पोखरामा बस्दै आएकी छिन् । छोरा उनीसँगै बस्छन् । उनका पूर्वपति ठाकुर पनि पोखरामै बस्छन् । यूआरएलका प्रबन्धक निर्देशक उनी सफल व्यवसायी हुन् ।