किरण श्रेष्ठ, तनहुँ । नेपाल मगर विद्यार्थी संघ तनहुँको आयोजनामा आइतबारदेखि दमौलीमा छैटौं लखन स्मृति कप सुरु भएको छ । आइतबार मगर विद्यार्थी संघ तनहुँ र मीन मावि थर्पु बीच भएको उद्घाटन खेलमा मिन मावि थर्पु १-० गोल अन्तरले बिजयी भएको छ ।

प्रमुख अतिथि व्यास नगरपालिकाका प्रमुख बैकुण्ठ न्यौपानेले प्रथम सहिद लखन थापाको फोटोमा अबिर र फुल चढाएर कार्यक्रमको उद्घाटन गरेका थिए । सो अवसरमा प्रमुख न्यौपानेले व्यास नगरपालिकामा मगरहरुको संख्या पहिलो नम्बरमा रहेको बताए । निरन्तर खेललाई आर्थिक भौतिक सहयोग गर्ने उनले बताए । साथै प्रथम सहिद लखन थापाको तस्बिर व्यास नगरपालिकामा राख्ने प्रतिबद्धता समेत गरे ।

उद्घाटन कार्यक्रमको अध्यक्षता नेपाल मगर विद्यार्थी संघ तनहुँका अध्यक्ष बसन सारुले गरेका थिए । नेपालका प्रथम सहिद लखन थापा मगरको १४२औं स्मृति दिवसको अवसरमा उक्त प्रतियोगिता आयोजना गरिएको हो । नेपाल मगर विद्यार्थी संघ तनहुँको आयोजनामा अन्तर कलेज सेभेन ए साइड खुल्ला छैटौं लखन स्मृति कप सुरु भएको हो । नेपालका प्रथम सहिद लखन थापा लाई सम्मान दिलाउन र खेलको माध्यमबाट राज्यलाई रचनात्मक दबाब दिन सो प्रतियोगिता गरिएको कार्यक्रमका वक्ताहरुले बताएका थिए ।

माघ २७ गते आइतबारदेखि सुरु भएको खेल फागुन २ गते सम्म जारी रहने आयोजकले जनाएको छ । प्रतियोगितामा प्रथम हुने टिमले नगद २५ हजार ५५५ र दोस्रो हुने टिमले १५ हजार ५५५ सहित ट्रफी, मेडल र प्रमाणपत्र प्राप्त गर्नेछन । जिल्लाका विभिन्न कलेजका १४ वटा टिमले प्रतियोगितामा सहभागीता जनाएको खेल संयोजक अनिल थापा मगरले जानकारी दिए । एउटा कलेजबाट दुइ वटा टिम दर्ता गर्न पाइने संयोजक मगरले बताए । प्रतियोगितामा बेस्ट प्लेयर, बेस्ट स्कोरर, बेस्ट किपर लाई समेत ट्रफी र मेडल दिइने खेल संयोजक मगरले जानकारी दिए ।

उक्त कार्यक्रममा नेपाल मगर संघ गण्डकी प्रदेशका अध्यक्ष सिद्धान्त गर्जा मगर, नेपाल मगर युवा संघ तनहुँका अध्यक्ष बादल आले लगाएतले शुभकामना मन्तव्य राखेका थिए । उक्त प्रतियोगिताको रेफ्री इन्द्र गुरुङ र बिजय राना रहेका छ्न । कार्यक्रमको संचालन संघकी बिनिता थापा मगरले गरेकी थिइन ।