पोखरा । विवेकशील साझा पार्टी ‘ठूलो माछा समाउ’ भन्दै अख्तियार कार्यालय पुगेको छ । पार्टीको राष्ट्रव्यापी कार्यक्रम अनुसार विवेकशील साझा गण्डकीले अख्तियार दुरुपयोग अनुसन्धान आयोग, क्षेत्रीय कार्यालय पोखरा पुगेर ध्यानाकर्षण गराएको हो ।

पार्टीले भ्रष्टाचार गर्ने साना कर्मचारीलाई मात्र होइन, ठूला कर्मचारी, नेता, मन्त्रीहरुलाई तत्काल कारबाहीको दायरामा ल्याउन दबाब स्वरुप कार्यक्रम गरेको हो । ठूला माछा नसमाएकाले व्यंग्यात्मक रुपमा ठूलो माछाको प्रतिक समेत प्रर्दशन गरी सरकारले सुनोस् भनेर शंख घण्ट समेत फुकेका थिए ।

विवेकशील साझा पार्टीका गण्डकी प्रदेश संयोजक महेश भण्डारी, केन्द्रीय सदस्य शुशिला केसी अधिकारी नेतृत्वमा यहाँका प्रदेश र जिल्ला स्तरीय नेता कार्यकर्ता सहितका टोलीले मंगलबार नयाँबजार स्थित आयोगको क्षेत्रीय कार्यालयमा पुगी अरबौंको भ्रष्टाचारमा मुछिएकाहरुलाई राजनीतिक प्रभावमा नपरी स्वतन्त्र र निष्पक्षले ढंगले अनुसन्धान गरी तत्काल कारबाहीको दायरामा ल्याउन ध्यानाकर्षण पत्र बुझाए ।

प्रमुखको अनुपस्थितिमा आयोगका उपसचिव रमेश ढकाललाई बुझाइएको ध्यानाकर्षण पत्रमा आर्थिक अनियमितता र पदीय दुरुपयोगको घटनाको अनुसन्धानलाई थप सशक्त र प्रभावकारी बनाउन पनि आयोगसँग माग गरिएको छ । भ्रष्टाचारमा मुछिएकाहरुलाई तत्काल कारबाहीको दायरामा ल्याउन अयोगको ध्यानाकर्षण गराइएको छ ।

सो अवसरमा विवेकशील साझा पार्टीका नेता कार्यकर्ताहरुले ‘बोलौं साथी बोलौं, भ्रष्टाचारीको पोल खोलौं’, ‘भ्रष्टाचारी जेल परुन’, भ्रष्टाचार कहिलेसम्म ? जनता सचेत नभएसम्म, नेताहरुको सम्पति छानविन गर लगायत लेखिएका प्लेकार्ड पनि प्रर्दशन गरेका थिए ।

माछाको प्रतिकमा वाइडबडी जहाज खरिद प्रकरण, ३३ किलो सुन तस्करी, एनसेल प्रालिको लाभांश कर, नेपाल आयल निगमको जग्गा खरिद प्रक्रियामा भ्रष्टाचार, गण्डकी मेडिकल कलेजबाट विद्यार्थी लुटिएको काण्ड का बारेमा लेखिएको छ ।

यस्तै, विवेकशील साझाले हेम्जामा पनि प्रदर्शन गरेको छ । पोखरा वडा नं. २५ का वडाध्यक्ष विश्वाज पौडेलको नेतृत्वमा मिलनचोकमा प्रदर्शन गरिएको छ ।

यसैगरी, गण्डकी प्रदेश अन्तर्गत नवलपुरको कावासोतीमा पनि प्रदर्शन गरिएको छ । युवादेखि वृद्धसम्मको सहभागिता रहेको थियो ।

अख्तियार काठमाण्डौं सहित सुर्खेत र धनगढीको कार्यालयमा पुगेर पनि ध्यानाकर्षण गराएको छ ।