पोखरा १ मंसिर । पोखरामा विस्तारै चिसो बढ्दै छ तर चुनावी सरगर्मीले माहौल तताएको छ । उम्मेदवारलाई जनताको घरदैलोमा पुगेर आफ्ना एजेण्डा बताउँदै भोट माग्ने चटारो छ । यहि चटारोकावीच कास्की क्षेत्र नम्वर २ का प्रतिनिधिसभा उम्मदेवार बाम गठबन्धनका रविन्द्र अधिकारी र काँग्रेसका देवराज चालिसेको भेट फेवातालमा भयो । फेवातालको चिसो सिरेठो छल्दै एपीवान टेलिभिजनमा उनीहरु आमनेसामने भए ।

एकै क्षेत्रका प्रतिष्पर्धी दुईले एउटै डुंगामा बसेर चुनावमा हारे सहयोग गर्ने र जिते सहयोग लिने बाचा गरे । दुवै उम्मेदवार एउटै डुंगाबाट फेवाताल सयर गर्दै पोखरा विकासबारे आफ्ना अवधारणा राखे । लगातार दुई संविधानसभा चुनावमा साविक कास्की ३ बाट बिजयी भएका रवीन्द्र अधिकारी र संसदीय प्रतिश्पर्धामा नयाँ अनुहार काँग्रेसका उम्मेदवार देवराज चालिसेबीच बैचारिक छलफल भयो ।

रवीन्द्रले आफ्ना कार्यकालमा भएका विकासबारे समीक्षा गरेर आगामी एजेण्डा पोखे । उता चालिसे चाहीँ हालसम्मका उम्मेदवारले देखिने गरी काम गर्न नसकेपछि आँफु उम्मेदवार भएको दावी गर्छन् । ‘विकास गर्ने अवधी हुन्छ । दुई कार्यकालसम्म जनताले विश्वास गरेर पठाएका प्रतिनिधीले काम नगरेपछि तेश्रो पटक उ रोजाईमा पर्दैन, चालिसेले भने–देशका हरेक ठाउँमा तेश्रो पटक नेतृत्व गर्न नपाउने नीतिगत ब्यवस्था हुनुपर्छ । नत्र नेतृत्व हस्तान्तरण हुन सक्दैन ।’

रवीन्द्रचाहीँ कार्यकारी पोष्टमा मात्रै यस्तो ब्यवस्था हुनुपर्ने बताउँछन् । ‘नीतिगत रुपमा निर्णय गर्न सके राम्रै हो । तर नेपालमा यो सम्भावना निकै कम छ, उनले भने–कम्तिमा कार्यकारी पोष्टमा तेश्रो पटक उम्मेदवार नबन्ने वातावरण बनाउनुपर्छ । त्यसमा म पनि सहमत छु ।’

दुवै नेताले फेवातालको संरक्षण र विकासलाई चुनावी एजेण्डाका रुपमा प्रश्तुत गरे । अधिकांश बिषयमा समान एजेण्डा अघि सारेका यि दुई नेताको चुनावी प्रतिश्पर्धा निकै रोचक हुने अनुमान छ । दुवैजना विद्यार्थी जीवनबाट नेपाली राजनीतिमा उदाएका हस्ती हुन् । ‘राजनीतिमा चालिसे जी मेरो गुरु हुनुहुन्छ । उहाँलाई म निकै सम्मान गर्छु, रवीन्द्र भन्छन्–हामी निष्पक्ष र स्वस्थ प्रतिश्पर्धा गर्छौं । जनताले जसलाई रोज्छन्, स्विकार्न तयार छु ।’

चालिसे पनि जनताको मतलाई कदर गर्दै हारजीत स्विकार्ने बताउँछन् । ‘जसका एजेण्डा मन पर्छ । जनताले उसैलाई भोट हाल्ने हो, देवराजले भने–जिते रवीन्द्रजीको सहयोग लिन्छु, हारे रवीन्द्रजीलाई सघाउँछु ।’ एकले अर्कालाई सघाउने विषयमा दुवैजना सहमत छन् । उनीहरुले सडक, खानेपानी, प्राकृतिक श्रोत साधनको संरक्षण र उपयोग, विमानस्थल निर्माण, चक्रपथ लगाएतका साझा एजेण्डालाई प्रमुखताका साथ लिएर जनताको मत माग्ने दौडाहामा छन् ।

• एजेन्सी