तनहुँ । जिल्ला प्रशासन कार्यालय तनहुँले देवघाट गाउँपालिकामा घुम्ति शिविर सञ्चालन गरी ११० जनालाई नेपाली नागरिकताको प्रमाणपत्र वितरण गरेको छ ।

ग्रामीण क्षेत्रका बासिन्दालाई घरदैलोमै सेवा र्पुयाउने लक्ष्यका साथ जिप्रका तनहुँले हरेक महिना स्थानीय तहमा घुम्ति शिविर सञ्चालन गर्दै आएको छ ।

कार्यालयले सञ्चालन गरेको उक्त शिविर मार्फत नागरिकता प्रमाणपत्र जारी, मतदाता नामावली संकलन लगायतका सेवा प्रवाह गर्ने गरेको प्रमुख जिल्ला अधिकारी भरत कुमार शर्माले बताए  ।

देवघाट गाउँपालिकाको वडा नं. २ मा सञ्चालन गरिएको शिविरमा स्थानीय ७१ वर्षीय मनिसरा थापा मगरलाई नागरिकताको प्रमाणपत्र प्रदान गरिएको छ ।

उक्त शिविरमा ६५ जना महिला र ४५ जना पुरुषलाई गरी ११० जनालाई नेपाली नागरिकताको प्रमाणपत्र जारी गरिएको प्रजिअ शर्माले जानकारी दिए ।

त्यस्तै, शिविरमा निर्वाचन कार्यालय तनहुँले ११२ जनाको मतदाता नामावली संकलन गरेको छ । जनतालाई घरदैलोमै नजिकबाट सेवा र्पुयाउने उद्देश्यले स्थानीय तहसंग समन्वय गरी हरेक महिना घुम्ति शिविर संचालन गरिदै आइएको छ ।

जिल्ला प्रशासन कार्यालय तनहुँले देवघाट गाउपालिका, शुक्लागण्डकी नगरपालिका, घिरिङ गाउँपालिका, भिमाद नगरपालिका, ऋषिङ गाउँपालिका, आँबुखैरेनी गाउँपालिका र बन्दीपुर गाउँपालिका समेतमा घुम्ति सेवा शिविर सञ्चालन गरिसकेको छ ।

प्रशासनले हालसम्म घुम्ति सेवा शिविर मार्फत १ हजार ३५८ वटा नागरिकता जारि गरिएको प्रजिअ शर्माले जानकारी दिए ।