तनहुँ । पोखराका पत्रकार ओम हमालको रिहाईको माग गर्दै नेपाल पत्रकार महासङ्घ तनहुँले सरकारलाई ज्ञापनपत्र बुझाएको छ । सर्वोच्च अदालत परिसरबाटै मङ्गलबार पुनः पक्राउ परेका हमालको रिहाई माग गर्दै शाखाले निमित्त प्रमुख जिल्ला अधिकारी रामप्रसाद ढकाल मार्फत् बुधबार सरकारलाई ज्ञापनपत्र बुझाएको हो ।

नेपाल पत्रकार महासङ्घ गण्डकी प्रदेशको आह्वान अनुसार जिल्ला प्रशासन कार्यालय मार्फत् ज्ञापनपत्र बुझाउँदै हमालको रिहाइको माग गरिएको शाखा अध्यक्ष ओमकार आचार्यले जानकारी दिए ।

जिल्ला प्रहरी कार्यालय उदयपुरको पक्राउ पुर्जा देखाएर सर्वोच्च अदालतको गेट अगाडिबाट अमानवीय ढङ्गले प्रहरीले हमाललाई पक्राउ गरेको घटनाप्रति शाखाको गम्भीर ध्यानाकर्षण भएको ज्ञापनपत्रमा जनाइएको छ ।

पत्रकारिता जगतमा लामो समयदेखि निरन्तर भ्रष्टाचार, अन्याय र बेथितीका विरुद्ध कलम चलाउँदै आएका पत्रकार हमालको निशर्त र यथाशीघ्र रिहाईको माग गर्दै ज्ञापनपत्रमा प्रहरीको गैरकानुनी पक्राउ आतङ्क बन्द गरी कानुनी राज्य, सर्वोच्च अदालतको आदेशको सम्मान गर्न तथा प्रेस स्वतन्त्रता र मानव अधिकारको रक्षा गर्न माग गरिएको छ ।

ज्ञापनपत्र बुझ्दै ढकालले ज्ञापनपत्र सम्बन्धित ठाउँमा पुर्याउने प्रतिबद्धता व्यक्त गरेका थिए ।