गण्डक न्युज पोखरा, २७ मंसिर / पोखरामा सवारी दुर्घटनामा एक युवकको ज्यान गएको छ । मंगलबार बेलुकी पोखरा लेखनाथ महानगरपालिका वडा नं. १७ स्थित शिशुवामा रोकिराखेको पिकअप भ्यानमा स्कुटर ठोक्किँदा लक्ष्मण भण्डारीको ज्यान गएको हो ।

जिल्ला प्रहरी कार्यालय कास्कीका प्रवक्ता प्रहरी नायव उपरीक्षक खड्कबहादुर खत्रीका अनुसार कैलाली, फुलबारी ४ घर भई पोखरा बस्दै आएका २१ वर्षीय भण्डारीको ज्यान गएको हो ।

शिशुवाबाट भण्डारढिकतर्फ जाँदै गरेको ग १३ प ५५५१ नम्बरको नयाँ स्कुटर बेलुकी सवा ५ बजे सडकमै रोकिराखेको ग २ च ४४८ नम्बरको पिकअप भ्यानमा ठोक्किन पुगेको थियो । दुर्घटनालगत्तै पश्चिमाञ्चल क्षेत्रीय अस्पतालमा लगिएपनि चिकित्सकले मृत घोषणा गरेका थिए ।

यसैबीच, बुधबार बेलुकी साढे ६ बजे गाडीको ठक्करबाट एक पुरुष गम्भिर घाईते भएका छन् ।

पोखरा २ अर्चलबोटमा ग १ ज ६५२८ नम्बरको गाडीले अन्नपूर्ण गाउँपालिका वडा नंं १ का विष्णुबहादुर कुँवर गम्भिर घाईते छन् । करीब ५५ वर्षीय कुँवरको मनिपाल शिक्षण अस्पतालमा उपचार भईहरहेको छ । अहिलेसम्म उनको होस आएको छैन ।

कुँवरलाई ठक्कर दिएर भागेको सो गाडी प्रहरीले तुरुन्त नियन्त्रणमा लिएको प्रहरी कार्यालयले जनाएको छ । गाडीलाई हिट एण्ड रन केसमा कारबाही प्रक्रिया अघि बढाएको जनाईएको छ ।