किरण श्रेष्ठ, तनहुँ । स्कुलका किशोरीलाई महिनावारी सम्बन्धि सचेतनामूलक तालिम दिइएको छ । श्री सर्वज्योती माध्यमिक विद्यालयमा अध्ययनरत ८ कक्षा देखि १० कक्षा सम्मका छात्राहरुलाई किशारोवस्थामा हुने परिवर्तन र त्यसमा आफूलाई कसरी अभ्यस्त बनाउने र महिनावारीका समयमा गर्नुपर्ने स्वास्थ्य सरसफाइ र हेरचाहका विषयमा जानकारी दिइएको थियो ।

टिम नेपो तनहुँको आयोजनामा बुधबार महिनावारि सम्बन्धि सचेतना तथा सेनेटरि प्याड वितरण कार्यक्रम सम्पन्न भएको हो । नेपो तनहुँका अध्यक्ष सुजन लौडारीको अध्यक्षतामा भएको उक्त कार्यक्रमको प्रमुख अतिथि प्रतिनिधिसभाकी सांसद कलिला खान थिइन् ।

सो अवसरमा प्रमुख अतिथि खानले महिनावारि लाज मान्ने कुरा नभई प्राकृतिक नियम भएको बताईन । ‘महिनावारि कुनै रोग होइन’ सांसद खानले भनिन ‘यो प्राकृतिक चक्र हो ।’ महिनावारि हुदा सरसफाईमा विशेष ध्यान दिनुर्ने उनले बताइन ।

समाधान अस्पतालका डा शुसिल पौडेलले महिनावारि सम्बन्धि जानकारी दिएका थिए । उक्त कार्यक्रमको सहआयोजक निलकुमारी मिया फाउन्डेसन रहेको थियो भने समाधान अस्पतालको प्राविधिक सहयोग रहेको थियो । सो अवसरमा स्कुले छात्राहरुलाई सेनेटरी प्याड समेत वितरण गरिएको थियो ।

कार्यक्रममा महिलाहरुमा आउने समस्या र तिनीहरुका समाधानका विषयमा पनि छलफल भएको समाधान अस्पतालकी सीईओ रुबिना खानले बताइन् । उनले शहर नजिकका महिला तथा किशोरीमा पनि महिनावारी सम्बन्धि समस्या र सरसफाईका विषयमा प्रशस्त जानकारी नभएको बताइन् । उनले भनिन्, ‘उनीहरुमा जुन रुपको जानकारी हुनुपर्ने थियो, त्यो पाइएन । दुर्गम क्षेत्रका हालत झन् कस्तो होला ?’

सो कार्यक्रममा विद्यालय व्यवस्थापन समितिका अध्यक्ष मदन तिमल्सेना, विद्यालयका प्रअ कश्यपराज जमरकट्टेल लगाएतले बोलेका थिए ।