किरण श्रेष्ठ, तनहुँ । चीनबाट शुरु भएर विश्वका विभिन्न देशमा फैलिरहेको कोरोना भाइरसको सम्भावित खतरालाई मध्यनजर गर्दै जिल्ला प्रशासन कार्यालय तनहुँले उच्च सतर्कता अपनाएको छ ।

अस्पतालमा विशेष सावधानी अपनाउन, भिडभाड गरेर फागु नखेल्न, ठुला सभा तथा समारोह र भोजभतेर नगर्न जिल्ला प्रशासन कार्यालय तनहुँले आग्रह गरेको हो ।

प्रमुख जिल्ला अधिकारी रुद्रप्रसाद पण्डितका अनुसार जिल्लाका चिकित्सकसँग छलफल गरिएको छ । अस्पतालमा छुट्टै कक्ष (आइसोलेसन रुम) खडा गर्न दमौली अस्पतालसंग समेत छलफल गरिएको उनले जनाकारी दिए । रोगको सङ्क्रमणदेखि भईहालेमा अपनाउनुपर्ने विधि र प्रक्रियाका बारेमा छलफल भएको उनले जानकारी दिए ।

जिल्लाका सबै अस्पताल सञ्चालक र चिकित्सकलाई तयारी अवस्थामा रहन प्रशासनले आग्रह गरेको छ । प्रमुख जिल्ला अधिकारि पण्डितका अनुसार यहि फागुन २४ देखि २६ गते सम्म दमौलीमा शुरु हुन लागेको दोस्रो राष्ट्रिय साहित्य सम्मेलन कविता प्रतियोगिता र विश्व हिन्दु महासंघ नेपालको आयोजनामा आगामी चैत १ देखि ४ गते सम्म हुन लागेको सनातन धर्म संस्कृति विषयक अन्तराष्ट्रिय महासम्मेलन समेत रोकिएको छ ।

जिल्ला प्रशासन कार्यालय तनहुँद्वारा जनहितमा जारी सूचना ।

जिल्लामा हुन लागेको मेला महोत्सव रोक्ने विषयमा सम्बन्धित आयोजकसँग छलफल गर्न लागिएको उनले जानकारी दिए । त्यस्तै फागु पुर्णिमामा जिल्लामा हुने कार्यक्रम समेत रोकिने उनले जानकारी दिए ।

जिल्ला प्रशासन कार्यालयले जिल्लाका १० वटै स्थानीय तहलाई कोरोनाबाट बच्ने उपायबारे सचेतनामुलक कार्यक्रम गर्न अनुरोध गरेको छ ।

प्रमुख जिल्ला अधिकारी पण्डितले होलीमा ठूलो जमघट नगर्न आम जिल्लावासीलाई आग्रह गरिएको जानकारी दिए । विगतका वर्षमा प्रशासनले सूचना जारी गरेर सभ्यतापूर्वक होली खेल्न आग्रह गर्ने गरेको भए पनि यस वर्ष भिडभाडसमेत नगर्न अनुरोध गर्न लागिएको उनले बताए ।

यस्तै ठूला भोज भतेर नगर्न सबैमा अनुरोध गरिएको भन्दै उनले भने, ‘यस विषयमा सञ्चारमाध्यमले आम नागरिकलाई बुझाइदिनुपर्यो ।’ निरन्तर रुघा खोकी लागे र ज्वरो आईरहे स्वास्थ्य संस्थामा गई चेकजाच गर्न जिल्ला प्रशासन कार्यालयले अनुरोध गरेको छ ।