तनहुँ । तनहुँको व्यास नगरपालिकामा प्रत्येक वडा कार्यालयले विदेशबाट फर्किएका व्यक्तिहरुको विवरण अद्यावधिक गरी आवश्यक रेखदेख तथा निगरानी गरी नगरपालिका कार्यालयमा अभिलेख दैनिक रुपमा पठाउनुपर्ने निर्णय गरेको छ ।

व्यास नगरप्रमुख वैकुण्ठ न्यौपानेको अध्यक्षतामा कोरोना भाईरस बिरुद्दको अभियानमा आइतबार बसेको व्यास नगरपालिका नगर कार्यपालिकाको आकस्मिक वैठकले उक्त निर्णय गरेको हो ।

संघीय मामिला तथा सामान्य प्रशासन मन्त्रालयले प्रत्येक वडासँग विदेशबाट फर्कनेको अद्यावधिक विवरण मागेको छ । कोरोना भाइरस (कोभिड-१९) रोकथाम तथा नियन्त्रण उच्चस्तरीय समितिले तयार भएको रोकथाम तथा नियन्त्रण कार्ययोजना मन्त्रालयले हरेक वडाको विवरण मागेको हो ।

मन्त्रालयद्वारा स्थानीय तहरूलाई आइतबार जारी परिपत्रमा भनिएको छ, ‘प्रत्येक वडा कार्यालयमार्फत विदेशबाट फर्किएका व्यक्तिहरूको विवरण अद्यावधिक गरी आवश्यक रेखदेख तथा निगरानी गर्ने र सोको संख्यात्मक विवरण दैनिक रुपमा मन्त्रालयमा पठाउने ।’

मानिसहरूको दैनिक जमघट हुने सार्वजनिकस्थलहरू दैनिक रुपमा सरसफाइ गरेर संक्रमणरहित बनाउन पनि मन्त्रालयले निर्देशन दिएको छ ।