तनहुँ । तनहुँको व्यास नगरपालिकाले जिल्ला ट्राफिक प्रहरी कार्यालय तनहुँलाई विभिन्न ट्राफिक संकेतका सामाग्री प्रदान गरेको छ । जस अन्तरगत १५ थान रिफ्लेक्टीभ बोर्ड र २० थान फ्लेक्स वोर्ड रहेको छ ।

बजार क्षेत्र तथा राजमार्गको सवारी व्यवस्थापनलाई मद्दत पुर्याउने उद्धेश्यले ति सामाग्रीहरु प्रदान गरिएको व्यास नगरपालिकाले जनाएको छ ।

उक्त सामाग्रीहरु प्रदान गर्नुहुदै व्यास नगरपालिकाका प्रमुख वैकुण्ठ न्यौपानेले शहरी क्षेत्रलाई व्यवस्थित गर्ने कार्यमा व्यास नगरपालिका सकृय रुपमा लागिरहेको बताए । उनले थपे ‘सफासडक, गणेशमान चोक लगायतका स्थानमा पार्किङ, सवारी व्यवस्थापनका लागि छलफल गरेर अगाडि बढ्नेछौ ।

कानुनको शासन कायम गर्नुपर्ने तर्फ कुनै कसर बाकिं नराख्ने गरी ट्राफिक व्यवस्थापनमा देखीएका समस्यालाई समाधान गर्न नगरपालिकाले क्रमश काम गर्दै जाने नगरप्रमुख न्यौपानेले बताए ।

कार्यक्रममा प्रहरी उपरिक्षक अरुण पौडेलले ट्राफिक व्यवस्थापन संवेदनशिल विषय भएकाले स्थानिय तहहरुबाट यस्को समाधानमा गरिएको सहयोग राम्रो रहेको बताए ।

नगरपालिकाले गर्ने विकास निर्माणमा सुरक्षा कायम गर्ने सबालमा प्रहरी सधै साथमा रहने प्रहरी उपरीक्षक पौडेलको भनाई थियो ।

ट्राफिक क्षेत्रका समस्याका विषयमा कार्यक्रममा जिल्ला ट्राफिक प्रहरी कार्यालय तनहुँका प्रमुख रेशम रानाभाटले जानकारी गराएका थिए ।