तनहुँ । जिल्ला प्रहरी कार्यालय तनहुँले माक्स नलगाउने लाई कारबाही गरेको छ । प्रहरीले माक्स नलागाउने ९८ जनालाई कारवाही गरी माक्स समेत वितरण गरेको छ ।

उनीहरुलाई १०० रुपैयाँ जरिवाना गरी माक्स समेत वितरण गरिएको जिल्ला प्रहरी कार्यालय तनहुँका प्रहरी नायव उपरीक्षक युवराज तिमिल्सिनाले जानकारी दिए ।

कोरोना भाइरस (कोभिड-१९) को जोखिम कायमै रहेको र घरबाहिर निस्कदा अनिवार्य मास्क प्रयोग गर्न पटक-पटक अनुरोध गरे पनि उक्त अनुरोध अटेरी गर्नेलाई कारवाही गरिएको प्रहरीले जनाएको छ ।

मास्क नलगाई पैदल हिँड्ने र सवारी चलाउनेलाई कारवाही गरेर प्रतिव्यक्ति १०० रुपैयाँका दरले जरिवाना गराइएको हो ।

जिल्ला ट्राफिक प्रहरी कार्यालयको सक्रियतामा सञ्चालन गरिएको कारवाही अभियानमा कारवाहीमा परेकालाई कोरोना भाइरसको बारेमा पूर्णरुपमा जानकारी समेत गराइएको प्रहरीले जनाएको छ ।

सरकारले कोरोनाबाट बच्न अनिवार्य मास्क लगाउन नागरिकलाई अनुरोध गरेको छ ।

हाल लकडाउन खोलिएपनि कोरोनाको जोखिम भने कायमै रहेको अवस्थामा मास्क लगाई अन्य स्वास्थ्य सुरक्षाको नियम पालना गर्न सरकारले नगारिकलाई अनुरोध गरेको छ ।

जिल्ला प्रशासन कार्यालय तनहुँले पनि सकेसम्म घरबाहिर ननिस्कन र निस्कनै परे अनिवार्य रुपमा माक्सकाे प्रयाेग गर्न आग्रह गरेकाे छ ।